Irakimi akersuuttarnerit ikiliartunngillat
Al Qaedakkut siuttuata Al Zakahwip amerikamiunit juunimi qaartartumeeriffigineqarluni toqutaanerata kingorna Irakimi akersuuttarnerit ikiliartornissaat ilimagineqaraluartoq paarlattuanik pisoqarpoq.
Peqqarniisaarniartartoqatigiit Al Qaidakkut Irakimi naalakkersuinermik suliaqarlutik ulappuseruttorput.
- Irakimi suliffissaaleqisorpassuit naalakkersuisunut amerikamiunullu kamaqqanerat atorluarlugu Al Qaedakkut naalakkersuinermik suliaqarnissartik angunialeruttorpaat. Suliffissaaleqisoqaannarani aamma pissaaleqisoqarpoq isumannaallisaanerlu aaqqivinnikuunani. Naatsumik oqaatigalugu Irakimi naalakkersuisut amerikamiullu akiorniarlugit Al Qaedakkut taamaaliorput, amerikamiut sakkutuuisa naalagarsuat oqarpoq.
Irakimi aqqusinerni qaammat kingulleq qaartartumeerisarnerit januaarimi qaartartumeerisarnernut naleqqiullugit marloriaatinngungajassimasut, amerikamiut nalunaarusiaata takutippaa.
Amerikami nunanut allanut ministereqarfiup nalunaarusiaq pigisaa alla, Amerikami aviisimi The Timesimi tusagassiortup saqqummiummagu paasinarsivoq, Irakimi inuiaat assigiinngitsut imminnut sorsuutilersinnaanerat ilimagineqartoq.
Nalunaarsuinerit tamarmik takutippaat Irakimi aatsaat taama akersuuttoqartigisoq. Peqqarniisaarniat amerikamiut sakkutuuinik irakimiunillu eqqissisimatitsiniartunik saassussisarnerisa saniatigut sunnit shiallu imminnut saassuttaqattaartarput. Amerikami nunanut allanut ministeqarfimmit nassuerutigineqarpoq, Irakimi naalakkersuisut eqqissisimatitsiniarnerigaluat iluatsissimanngitsoq. Immikkut ilisimasallit amerikami naalakkersuisunik oqaloqateqaqqammisut aviisimut oqarput, Irakimi naalakkersuisut atasinnaanerat qularnartoq. Amerikami naalakkersuisut atorfilittaasa ilaat aviisimut oqarpoq USA-mi naalakkersuisut tamat oqartussaaqataanerat atorlugu Irakimi suliniarnertik iluatsinngimmat allatut irakimiunik ikiuiniarnertik pilersaarusioqqusimagaat.
