Irakimi akersuunneq sakkortusiartuinnarpoq

oktobarip 03-at 2006 11:04

Irakimi upperisarsioqatigiit assigiinngitsut imminnut akersuunnerat ullut tamaasa sakkortusiartorpoq.

Suut tamarmik qaammatit arlaqanngitsunnguit qaangiuppata ajalusoorsinnaanerat USA-miit mianersoqqussutigineqarpoq. Irakimi naalakkersuisut akersuunnermik unitsitsisussamik maanna pilersaarusiorsimapput.

Timinik toqungasunik aqqusinermi ullulluunniit tunuatungaanni ullaat tamaasa nassaassaqartarpoq. Sulisartut nalinginnaasut aallarunneqartarput naalliutsinneqariarlutillu toqunneqartarlutik, igitassatullu allatulli

eqqaavinnut kingorna igiinnarneqartarlutik.

Suliffissuarmi sulisut 24-t sapaatiummat aallarunneqarput, nalunaaquttallu akunneri arlallit qaangiummata toqungasut arfineq-marluk nassaarineqarput, sinnerisalu 17-usut qanoq pineqarsimanerat ilisimaneqanngilaq. Qarasaasiaarniarfimmi sulisut 14-it angutinit sakkulersorsimasunit ippassaq aamma aallarunneqarput, qanorlu pineqarsimanerat tusarfigineqanngilaq.

Irakimi illoqarfiit pingaarnersaanni Bagdadimi illoqarfinnilu allani inuuneq taamaappoq. Qaammatit kingulliit ingerlaneranni Bagdadiinnarmi inuit tusintit arlallit toqunneqarput. Tassa upperisarsioqatigiit shia-muslimit upperisarsioqatigiit allat sunni-muslimiusut toqorartarpaat illuatungaanilu sunni-muslimit shia-muslimit toqoraasartuinit toqunneqartarlutik.

Tamanna Irakimi naalakkersuisut iliuuseqarfiginialerpaat. Nunap immikkoortuini tamani isumannaallisaaniaqatigiinnik pilersitsisoqassaaq. Taakkunani ilaasortaassapput politikkikkut suliniaqatigiiffiit, upperisarsioqatigiit assigiinngitsut, inuiaallu assigiinngitsut. Taakkua nunat allamiut sakkutuuisa nakkutilliisuutitat sulinerat ataqatigiissaassavaat. Taamaalilluni shia-muslimit sunni-muslimillu toqoraannerisa unitsinneqarsinnaanissaa kissaatigineqarpoq. Sunni-muslimit siuttuisa kissaatigaat isumannaallisaaniaqatigiit suliníssaat ataqqineqartariaqartoq, taamaattoqanngippat Iraki ajalusoorluinnarsinnaammat.