Irakimi 50.000-it akerliussutsimik takutitsipput

Irakimi illoqarfiit pingaarnersaanni Bagdadimi innuttaasut 50.000-t, USA-p nunaminni sakkutooqartitsiinnarneranut atatillugu akerliussutsiminnik ullumi takutitsipput.
Allattoq Najaaraq Egede
oktobarip 18-at 2008 13:43

Islamimik upperisallit shiitit siuttuat Muqtada al-Sadr oqarpoq, amerikamiut Irakimiiginnarnissaannik USA-p Irakillu isumaqatigiissuteqalersaarnerat akerlerigamikku taamaaliorlutik.

Bagdadip ilaani Sadr City-miit illoqarfiup qeqqanut ingerlaaqatigiittoqarpoq, oqaatsit ”Tiguaasut nigoritsi” aamma ”Amerika naamik-naamik” suaartaatigineqaatigalutik.

USA-p Irakillu isumaqatigiissut suli atsiunngilaat, ilimagineqanngilarli Irakimit atsiorneqarnissaa. Oqaasertaasa ilaat avammut suli tusarliuteqqusaanngitsut ingerlateqqinneqarsimapput, ilaatigut amerikamiut sakkutuuisa Irakimi oqartussanit Irakimiiginnarnissamik qinnuigineqanngikkunik 2011-imi anereersimanissaat tusarliunneqarsimalluni.

Muqtada al-Sadr amerikamiut sakkutuuinik sakkulersorfiginnittareerpoq, maannali politikki sakkugalugu Irakip inatsisartuini 30-inik ilaasortaatitaqarnermigut sorsulerluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq