Irak saassunneqarpoq

Ukiut pingasut matuma siorna USA-p sakkutuuinit Irak-i isaaffigineqarpoq, ullumilu USA-p saassussinera sakkortunersaattut taaneqarsinnaasoq ingerlanneqarpoq.

Timmisartut qaartartunik usisut 50-it illoqarfimmik Samaramik qulangiuaallutik saassussisaqattaarput. Irak-imi sakkutuut USA-mik illersuisut Amerikamiullu sakkutuui katillugit 1500-ut saassussinerni peqataapput. Naatsorsuutigineqarpoq silaannakkut saassussisaqattaarnerit ulluni arlalinni ingerlassasut.

Amerikamiut sakkutuuisa saassussinermi aqutsisuat BBC-mut oqarpoq, saassussisaqattaarnerit siunertarigaat pikitsitsinianik ikilisaanissaq.

Danmarkimi Syddansk universitetimi nunanut kangillernut tunngasunik ilisimatooq, lektori Helle Lykke Nielsen oqarpoq, Samara-mi saassussinerit tupaallaatigisassaanngitsut.

- Qaammat kingulleq qinusarfiit ilaannik saassussisimanerit, Sunnisiortut shiasiortullu pikitsitsilernerinik kinguneqarpoq.

Sunnit Shiallu imminnut saassuttaqattaarput, akiniaaqattaannerillu ingerlanneqartarlutik, tamannalu amerikamiut sakkutuuinit unitsinniarsarineqarpoq, Helle Lykke Nielsen naggasiivoq.