Irak-imi ullorsiornermi toqutaasorpassuit

Irakimi shia-muslimit ullumi ulloq nalliussisagartik pingaarnerpaaq nalliussimmassuk inuit 60-70-it missaat toqutaapput.

Sumiiffinni assigiinngitsuni sunni-musliminit saassunneqartarput, aammattaarli akiniaallutik saassussisariaqarsimapput.

Irakimi ullumi ulloq shia-muslimit pingaartitaraat. Aamma ullumikkut ingerlaaqatigiipput imminut iperartortarlutik, pruffiitip ernutaata toqunera eqqaaniarlugu. Soorlu siusinnersukkut pisartutut taamatut ingerlaaqatigiileraangata ikinnerussuteqartunit sunni-musliminit saassunneqartarput.

Nutaarsiassaqartitsiviup Reuterip nalunaarsuutai imaapput:

Marloriarluni qaartartumeerisoqarneratigut inuit 36-it toqutaapput, taakkua illoqarfinni minnerusuni pisimallutik.

Illoqarfiit pingaarnersaata Bagdadip avannaata kangiani aqqusinermi ingerlaartut aqqutigiisaanni qaartitsisoqarmat 30-t toqutaapput. Tassanngaanniit 80 kilometerisut kujasinnerusumi imminuujutigaluni oqaluffiup silataani qaartitsisoqarmat 23-t toqutaapput. Sumiiffimmi allami bussit mikisut eqqaanneqarmata sisamat toqutaapput.

Aammattaarli shia-muslimit akiniaallutik saassussisarsimapput, soorlu Bagdadimi sunni-muslimit najugaqarfiannut qaartartunik igeriussisaqattaartoqarmat 17-it toqutaapput 72-illu ikilerneqarlutik.

Ingerlaaqatigiinnerni ullumikkut toqutaasut ukiut pingasut matuma siornanut sanilliullugit ikinnerupput, taamanikkummi inuit 170-it toqutaammata.