Irak-imi qimaasut amerligaluttuinnarput

Irakimiit qimaasut amerligaluttuinnarput inunnullu ajunaarnersuaqarnissaa aarlerinarsiartorpoq.

Taamaattumik Naalagaaffiit Peqatigiit Genevemi Irakimi qimaasut pillugit ataatsimeersuartitsipput.

Inuit 4 millionit Irakimi eqqissiviilliornernit qimarrapput. Tamanna pissutigalugu Naalagaaffiit Peqatigiit maanna ataatsimeersuartitsipput.

Nunat assigiinngitsut 60-it sinniisaat katersuupput, nunamit eqqissiviilliorfioqisumit qimaasut qanoq iliuuseqarfigineqarsinnaanerat oqaluuseriniarlugu.

Naalagaaffiit Peqatigiit Irakimi qimaasut pillugit aatsaat pisortatigoortumik ataatsimeersuartitsipput. Naalagaaffiit Peqatigiit qimaasunut qullersaqarfiata Irakimi qimaasut, 1948-mi Palæstinamiut qimaatinneqarmatali aatsaat taamak amerlatigisunik qimaasoqartoq oqaatigaa.

1948-mi pisoqarneratulli nunat sanilerineqartut, tassa Syria aamma Jordan qimaaffigineqarput.

Irakimiut qimaasut 750.000-it maanna Jordanimiipput. Jordan Danmarkitut inuttussuseqarpoq qimaasullu pissutigalugit maanna innuttaasut 14 procentimik amerleriarsimapput.

Syriami Irakimiut qimaasut 1,2 millioninik amerlassuseqarput. Taakkua saniatigut qimaasut 100.000-it Iranimut, Igitsinimut Tyrkiamullu qimaasimapput.

Nunanut Irakip eqqaamiuinut qimaasut ima amerlatigilerput nunat qimaaffigineqartut qanoq iliornissaminnik piareersaateqartariaqalerlutik tamannalu Naalagaaffinnit Peqatigiinnit inuillu pisinnaatitaaffii pillugit suliniaqatigiiffinnit ernumanartinneqarpoq.

Jordanip Igitsinillu killeqarfitik matoreersimalerpaat aamma Amnesty Internationalimit oqaatigineqarpoq qimaasut toqutaasussanngorlugit utertiinnarneqartartut. Taamaattumik Naalagaaffiit Peqatigiit qullersaata Ban-ki-moonip ataatsimeersuaqataasut qinnuigai Irakimiut qimaasut utertiinnartaqqunagit.

Irakimi naalakkersuisut nunaqqatiminnut nunanut allanut qimaasunut 180 million koruuninik aningaasaliiniarlutik aalajangersimapput, taamaaliornikkut neriuutigineqarluni USA aamma EU aammattaaq ikiuiniarlutik aningaasaliissuteqarumaartut.