Irak-imi ministerit ilaat Danmarkimut tikeraarpoq

Irakimi nunanut allanut ministeri, Hushiar Sebari, ullumi Danmarkimut tikeraarpoq.

Tusagassiortunik katersuutsitsinermi Sebari oqarpoq danskit sakkutuuisa Basrap eqqaaniit angerlarartinniarneqarnerat piffissami naleqquttumi pissasoq.

Aamma taamatut aalajangernerup tupaallaatigineqarnera ilumuunnginnerarpaa:

- Danskit naalakkersuisuisa qaqugu sakkutuunik angerlarartitsilernissaminnik aalajangernerat uatsinnut tupaallaataanngilaq, Irakimiut nunanut allanut ministeriat tusagassiortunik katersortitsinermi oqarpoq aamma illersornissamut ministerimik Søren Gade-mik nunanullu allanut ministerimik, Per Stig Møllerimik ataatsimeeqateqareerluni.

- Tamanna iliuuseriniakkatsinnut tassa isumannaatsuunissap akisussaaffigilernissaanut naapertuulluinnarpoq, Sebari oqarpoq.

- Aamma aggustimi angerlarartitsiniarneq pilersaarutitsinnut naapertuuppoq, taamanikkumullu Bagdadimi iliuuserineqartut iluatsissimanissaat neriuutigaarput. Aamma danskit nunanut allanut ministeriat oqarfigaara danskit sakkutuui Irakimut ikiuukkiartorsimasut maanna allamut ikiuukkiartorsinnaalissasut, Hushiar Sebari oqarpoq.

Matumani Per Stig Møllerip oqaatigaa iligiit qimaannarniarneqanngitsut, sakkutuunulli taarsiullugu qulimiguulinnik, sakkutuunut ilitsersuisussanik, politiinut ilitsersuisussanik inuinnarnillu Irakimi naalakkersuisunik tapersersuisussanik ikiuunniarlutik.

Irakip nunanut allanut ministeriata ilanngullugu oqaatigaa Danmarkip Tuluillu Nunaata Irakip Kujataaniit sakkutuunik angerlarartitsiniarneri USA-llu sakkutuunik amerlanerusunik Bagdadiliartitsiniarnera imminnut akerleriinngitsut.

- Sakkutuutta isumannaatsuunissamillu suliaqartut sungiusartuarnerisa kinguneratut isigaara, tassa sakkutuut avataaneersut suliarisartagaraluinik nammineerluta isumaginnissinnaalernitsinnut tamanna takussutissaavoq, Irakip nunanut allanut ministeria oqarpoq.