Irak-imi meeqqat naallioqaat

Meeqqat Irakimi sorsuffiusumiinnertik, tarnikkut ajoqutigileraluttuinnaraat, aammalu inuiaqatigiinni kinguaariinni aggersussani ajoqutigilluinnarsinnaagaat, tarnit pissusiinik ilisimasallit oqarput.

Meeqqat suinissarineqartutut oqaatiginiarneqartarput, Irak-imili meeqqat misigissutsimikkut naalliuuteqartangaarmata, Irak-imi siunissaq nalorninartorsiorfiusutut, Tuluit nunaanni aviisi saqqummersartoq The Guardian allaaserisaqarpoq.

- Meeqqat amerlaqisut ersiorlutik kiffaanngissuseqaratillu killilimmik pinnguarsinnaanertik ajoqutigilluinnarpaat, Sherif Karachatani, irak-imi tarnit pissusiinik ilisimatuutut atorfilik oqarpoq, nangillunilu: - Meerarpassuit meeraqatiminnik toqutaasunik allatigulluunniit ajortumik pineqartunik takusaqartarput. Aviisi The Guardian, qaammatini arlalinni Irak-imi apersuisarluni misissuisimanermini paasisaasa ilagaat, meeqqat sinnarluttarlutillu oqimangiuteqakkajuttut, aammalu kamassaqartorujussuusut. Allaat angajoqqaaminnik saassussisartut nalinginnaaleriartortut, Irak-imi tarnit pissusiinik ilisimasallit oqarput.

Immikkut aningaasaliisoqanngippat, kinguaariit naalliuuteqarluinnartut aaqqissoruminaatsullu pilersinneqassasut, Sherif Karachatani oqarpoq.