Irak-imi inuit 100-it ullumi toqutaapput
Inuit ikinnerpaamik hundredit ullumi Irak-imi qaartartumeerisoqarnerani toqutaapput. Angutit marluk imminnuujutigalutik qaartartumik qaartitsimmata, inuit 60-it toqutaapput, isumannaallisaarnermut tusarfiit nalunaarput.
Naalakkersuinikkut perulluliornerit annikillisinniarlugit, amerikamiut aqutaannik isumannaallisaaneq aallartimmalli aatsaat taamak sakkortutigisumik pinerliineqarpoq.
Angutit marluk qaartartumeerisut, Bagdad-ip avannaata kangisinnerusortaani Shalalla-imi inuppassuit akornanni niuffatitsiffiusumi, qaartartut vest-iminnut ililllugit qaartussanngortissimavaat.
Bagdad-imi qaartartumeerineq pivoq akunnerit arlallit sioqqullugit, Bagdad-imit avannamut 80 kilometerinik ungasitsigisumi illoqarfimmi Khalis-imi biilit sisamat qaartartunik usillit, qaartitsimmata, ikinnerpaamillu inuit 43-it toqutaanerannik kinguneqartumik.