Iqalunnut timmisartuussisalernissaq piviusunngorallarnavianngilaq
Nunarsuarmi aningaasarsiorneq aatsaat pitsaanerulissappat pilersaarutit piviusunngortinneqarsinnaasut, siusinnerpaamillu 2011-mi piviusunngortinneqarsinnaassasut, Air Greenland sinnerlugu oqaaseqartinneqartoq atersineqanngitsoq CBC-mut oqarpoq.
Iqaluit Nuullu akornanni timmisartuussisalernissaq pillugu Namminersorlutik Oqartussat, Nunavummilu oqartussat, aamma timmisartuutileqatigiit First Airip aamma Air Greenlandip akornanni juulimi ataatsimeeqatigiittoqartussaagaluarpoq, Air Greenlandimili saqisunut isumaqatigiinniarnerit suliumajunnaarnermik kinguneqarsinnaanerat aarleqqutigineqarmat ataatsimiinnissaagaluaq taamaatiinnarneqarpoq.
Iqaluit Nuullu akornanni timmisartuussisalernissap 2010-mi piviusunngortinneqarsinnaanissaa taamanikkut neriuutigineqaraluarpoq. Air Greenlandiminngaanniilli CBC-mut oqaaseqartinneqartut oqarsimaneragaapput, timmisartuussisalernissamut Nunavummi Nunatsinnilu oqartussat pisussaaffilerneqassasut.
Taamatut oqarneq Canadamit pakatsissutigineqarpoq. Iqaluit Nuullu akornanni timmisartuussisalernissaq Canadami inuutissarsiornermik ingerlatalimmit Kenn Harperimit tapersersorneqaraluarpoq, taanna oqarluni, naggueqatigiinni Inunni angisuumik sunniutillit marluk akornanni attaveqaqatigiinniarnerup taama ilungersunartiginera kanngunaannartoq.
First Airip aamma Air Greenlandip suleqatigiinnerisigut Nuup Iqaluillu akornanni ukiuni 20-ni timmisartuussisoqarnikuugaluarpoq, tamannali 2001-imi unitsinneqarluni.
Naak Iqalunniit Nuummut 825 kilometeriinnaagaluartoq, Nunatsinniit Canadaliarusuttut illuatungaanilu Canadamit Nunatsinnukarusuttut maanna Europakkooqqaarlutik ornitaminnut aatsaat apuussinnaapput.
