Iqalunnut timmisartuussinerit amerlineqalersut
Sapaatip akunneranut timmisartuussinerit marlunngortinneqassapput. Iqalunnullu utimullu ataasinngornikkut tallimanngornikkullu timmisartuussisoqartalissaaq. Air Greenlandip Canadamut timmisartuussisarneq siorna misileraatitut aallarteqqippaa. Canadamut timmisartuussisarneq 2001-imiilli uninngasimagaluarpoq, taamani First Airip Canadap Nunattalu akornanni timmisartuussineq unitsiinnartariaqarsimallugu. Nuup Iqaluillu akornanni timmisartuussineq Dash-8 atorlugu ingerlanneqassaaq.
-Ilaqutariit ikinngutigiillu angalanerisa amerlassusaat tupaallaatigisimavarput. Naatsorsuutigisatsinnimmi amerlanerusimaqaat. Timmisartuussisalermi niuertut Kalaallit Nunaata Canadallu akornanni angalasut sullinniarneqarsimagaluarput, takornarialli ilaasorisartakkagut amerlasuupilussuusimapput. Tamakku timmisartuussinerit ukiormanna amerlinissaannut peqqutaaqataapput, Air Greenlandimi tuniniaanermi pisortaq Christian Berg cbc.ca-mut oqarpoq.
