Iqalunnut aqqut pakatsisitsisoq

Air Greenlandip Nuummit Nunavumi illoqarfiit pingaarnersaannut Iqalunnut timmisartuussinerisa siullersaat tallimanngormat pivoq. Pilersaarutit malillugit aggustip qeqqata tungaanut ataasinngornerit tallimanngornerillu tamaasa timmisartuussisartussaavoq. Immininniinerilli amerlagisassaanngillat, CBC Canada taama allaaserisaqarpoq.

Timmisartortitseqatigiiffiup tuniniaanermut pisortaa, Christian Kjeldsen, Canadami tusagassiorfimmut oqaatigaa timmisartuussisarneq ingerlaannassanersoq Air Greenlandip aasap naanerani isummerfigiumaaraa.
 
- Tunisavut pisarnertut pitsaatiginngillat. Tunisassatut naatsorsuutigisavut suli takusinnaanngikkaluarlutigit timmisartuussinerput ingerlatiinnassavarput. Ilanngullugu aamma oqaatigaa uuliasiortut aatsitassarsiortullu angalavallaarunnaarsimanerat tunisat taama isikkoqarnerinut pissutaagunartoq.

Nuup Iqaluillu akornanni timmisartuussineq septembarip tungaanut ingerlanneqartussaagaluarluni aggustimut sivikillineqareersimavoq.