Assi: Tim Winkelmans

Arctic Circle Iqalunni mittarfittaassaq OPP-mit aningaasalersorneqassaaq

Nunavummi 20-nik inoqarfeeraqarfiusumi aningaasarsiornikkut ineriartortitsinissamut atortulersuutit amerlanerusut pitsaanerusullu pisariaqartinneqarput.

Tamanna piiaaveqarnermut Iqalunnilu mittarfeqarfiup nutarsarnissaanut aamma atuuppoq.

Taamaammat pisortat namminersortullu aningaasalersuinermik ingerlatseqatigiiffiisa Issittumi ataatsimoortumik aningaasalersuinissaat - aamma OPP-mik suleqatigiinnermik taagorneqartup - atorneqarnissaa tulluassaaq:

Nunavummi aningaasarsiornikkut ineriartortitsinermut assartuussinermullu ministeri, Monica Ell-Kanayuk taama oqarpoq, taassuma OPP PPP-mik taagorpaa -  public-private partnership.

- Namminersortummi aningaasaateqaraluarlutik atortulersuutit aningaasalersorsinnaanngilaat - aamma uagut taamaaliorsinnaanngilagut, ministeri oqarpoq.

Inissialiortitsinissaq kissaatiginerugaat

Tamatumunnga peqatigitillugu aqqusinernik, mittarfinnik umiarsualivinnillu sanaartornissaq tunulliunneqarluni inissianik amerlanerusunik sanaartornissaq salliutinneqartarpoq, Nunavummi aningaasaqarnermut assartuussinermullu ministeri, Arctic Cicrle Greenland Forumimi Nuummi pisumi ulluni peqataaqqammersoq taama oqarpoq:

- Suliniutit allat pisariaqartinneqarnerusut, soorlu inissiat, peqqissaaviit atuarfiillu piumaneqarnerupput.

Taamaammat Canadap naalakkersuisui, Nunavummi naalakkersuisut aningaasalersuinissamillu ingerlatseqatigiiffiit namminersortut Iqalunni mittarfeqarfissuup nutarterneqarnissaa aningaasalersussavaat - pisortani sanaartornikkut suliniutaasa annersaat 2017-imi naammassineqartussaq.

- Uatsinnullu pitsaasoq tassaavoq aningaasaliissutigisassagut ukiut 30-it ingerlanerani akilersussagatsigit, Monica Ell-Kanayuk oqarpoq.

Atortulersuutit aningaasarsiornermut siuarsaataassapput

Atortulersuutit aningaasarsiornikkut ineriartortitsinissamut pingaaruteqassusiat Namminersorlutik Oqartussanit siorna Nunavummut angalasoqarneranit nalunaarusiami aamma atuarneqarsinnaavoq.

Tassanimi oqaatigineqarpoq atortulersuutit pitsaasuunnginneri pissutigalugit Nunavummi piiaaveqarnikkut suliniutinik aallartisaanissaq Canadami sumiiffinnut allanut naleqqiullugu 2 - 25,5-eriaammik akisunerusoq.   

Nunallu immikkoortuani naalakkersuisutta tamanna tamakkerlugu akilersinnaanngilaat, Nunavummi aningaasarsiornikkut ineriartortitsinermut assartuussinermullu ministeri, Monica Ell-Kanayuk, taama oqarpoq

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat