Iqalunni inuuneq ingerlaqqippoq

Iqalunni ilinniagaqartut 100-it missaannik amerlassuseqartut, taakkualu meeraasa najugaqarfiat ikuallammat eqqugaasut angerlarsimaffeerupput.

Aningaasat, atisat, nerisassat, ulluinnarnilu pisariaqartinneqartut tunissutigineqarput, taakkualu Iqalummiunit assut qujamasuutigineqarput, Canadami KNR´p ilanngutassiortua Marianne Stenbæk oqaluttuarpoq.

Iqalunni ikuallattoqarnerani eqqugaasunut tunissutit Canadap avataanit aamma tunissutigineqarput.

Kalaallit Nunaanni inuit ataasikkaat aamma Kalaallit Røde Korsiata  tunissuteqarnerat Canadami aviisit radiullu arlaqartut arlaleriarlugit allaaseralugillu aallakaatitsinerminni taasarpaat.

Tunissutigineqartunut inuit qujamasuttorujussuupput, Meeka Kilibuk, CBC Northimi tusagassiortoq unnersiorpoq.

Issittumi universitetimi ilinniagaqartut najugaqarfiat nungulluni ikuallappoq.
Ikuallattoq annertoorujussuuvoq. Inissiaasimasup sinnikui ungalusamit maannakkut assersoqqapput ikuallaffiusorlu politiinit maanna aamma nakkutigineqarpoq.

Ikuallannermi ajunaartut maanna qulakkeerlugu paasineqarsimalerput, tassaallutik meeqqat allereersimasut qatanngutigiit niviarsiaraq nukappiararlu - ikuallannermi ajunaartuullutik.

Ajunaartut ilisaanissaannut  Iqalunni innutaasut aningaasanik katersipput, ajunaartut  ilaqutaasa ilisinermi najuunnissaannut atorneqartussanik. Ajunaartullu ilisaareerput.

Ikuallanneq sumit aallartissimanersoq maanna paasineqarpoq, piaaraluni ikuallatitsisoqarsimalluni. Kina imaluunniit kikkut sunalu pissutigalugu ikuallatsitsinersut suli paasineqanngilaq. 

Iqalunni ulluinnarni inuuneq ingerlaqqippoq, ilinniagaqartut ilinniarfigisaminni Arctic College-mi ilinniarnertik ingerlateqqippaat, tamarmillu inissarsineqarput, nutaanillu atisartaartinneqarlutik.

Canadap sinneraniit Kalaallit Nunaannillu tunissutigineqartut qujamasuutigineqarput.