Iqalunni innuttaasut bilernissaminnik ilinniartinniarneqalerput
Nunavumi illoqarfiit pingaarnersaanni Iqalunni innuttaasut bilernissaminnik ilinniartinniarneqalerput. Illoqarfimmi aqutsisut aqqusinikkut angallanneq pillugu aalajangersaaqqammersut, CBC North allappoq.
Massakkut inatsisit atuuttut naammaginannginneri peqqutigalugit, inatsisit nutaat malinneqarnersut nakkutigissallugit ajornakusoorsinnaavoq.
-Maani illoqarfimmi uneqqusissummik allagartaqaraluarpalluunniit unittoqarneq ajorpoq. Inuinnaat ikaarfissaat aamma ataqqineqarneq ajorput. Taava qanoq ilillluta inatsisit malinneqarnersut nakkutigisinnaassavarput politiit marluinnaat inatsisinik unioqqutitsisoqannginneranik nakkutiginnittussaatillugit, Iqalunni illoqarfiup siulersuisuinut ilaasortaasoq, Claude Martel aperivoq.
Inatsisit nutaat akornanni erseqqissarneqarpoq sangulernermi aqqusinermi qulliit unittarfiusut saavanni uninngasoqaqqusaanngitsoq, inuinnaat ikaartarfianni uninngasoqassanngitsoq, inuinnaallu aqqutaanni bilertoqaqqusaanngitsoq.
