Iqalunni imigassamút katsorsaanerit amerliniarneqarput

Nunavumi illoqarfiit pingaarnersaanni Iqalunni pinerliinerit annertusiartuinnarput, amerlanertigullu pinerliisut imigassartorsimasarput. Tamanna illoqarfimmi siulersuisut tupigusuutiginngilaat, katsorsaanerillu amerlanerit aallartisarniarneqalerput.

Iqalunni illoqarfiup siulersuisuinut ilaasortaq Simanuk Kilabuk-ip tupigusuutiginngilaa Nunavup illoqarfiisa pingaarnersaanni pinerliisarnerni imigassaq akuusarmat. Pinerliisarnerit piffissap sivisuup ingerlanerani annertusiartuinnartut sapaatip akunnera kingulliup politiit saqqummiutaanni takuneqarsinnaavoq.

Illoqarfiup siulersisuinut ilaasortaq nammineq imigassamik ajornartorsiuteqarsimavoq, nalunnginnerarpaalu imigassaq inuup inuuneranut qanoq sunniuteqarsinnaasoq.

Simanuk Kilabuk-i isumaqarpoq, innuttaasut tamarmik ajornartorsiut qaangerniarlugu suleqatigiittariaqartut, inunnullu imigassamik ajornartorsiutilinnut ikiorsiissutinik periarfissanik amerlanerusunik peqartariaqartoq.

Illoqarfiup borgmesteriata paaserusuppaa pinerliisartut imigassaq suminngaanniit pisarneraat. Ikinngutiminnit imaluunniit qitittarfinni.

Tillinniarnerit nakuusernerillu septemberip naanerani siorna piffissap taamaalineranut sanilliullugu qaffariangaatsiarsimapput. Aamma ikioroornartumik unioqqutitsisut amerlisimapput.

Septemberip naanerani politiit 5.100-riarlutik ikiuiartoqqullugit sianerfigineqarsimapput. Siornamut sanilliullugu 1100-nik amerlanerullutik.

Nalunaarsuinerni takuneqarsinnaavoq inuit 1700-t isertitsivinni unnuisinneqarsimasut, ikiaroornartoq pillugu unioqqutitsisut marloriaatinngorsimasut, tillinniat persuttaasullu aamma amerliartortut takuneqarsinnaavoq.

Kisitsisilli nuanniitsuinnarnik kisimi saqqummersitsinngillat. Iqalunni kinguaassiutitigut pinerliinerit ikiliartortut aamma nalunaarutigineqarpoq.