Iqalunni eqqaavissuaq suli ikumajuarsinnarpoq

Eqqaavissuup ukiup aappaata affaani ikumanerata qaminniarnissaa Nunavummut akisussaqaaq.
Allattoq Elisa Isaksen
juulip 29-at 2014 04:56

Akilinermi Iqalunni eqqaavissuaq qaammatit 20-t matuma siornagulli ikumalerpoq.

Ikuallannerata nammineerluni qaminnissaa naatsorsuutigalugu ikumatiinnarniarlugu qatserisartut aalajangersimapput, taamali pisoqanngilaq.

Ikuallattumi innermik ersittoqanngikkaluarpoq, tassami inneq eqqagarpassuit ilaatigut inissiatut sisamanik quleriittut portutigisut iluanni ikumammat. Pujuali Iqaluit ilaanni naamaneqarsinnaavoq tamatumalu kinguneranik ilaatigut atuarfiit matuneqartariaqartarsimapput aamma inunnut anersaartorniarnikkut ajornartorsiuteqartunut ulorianarluinnarluni.

Maanna oqaatigineqarpoq, ikuallattup qaminniarnissaanut immikkut ittunik atortussanik pissarsiniarnissaq 10 millionit koruunit missaannik akeqassasoq, aningaasallu taama amerlatigisut pigineqanngillat. Taamaattumik ikuallattup qaminniarneqarnissaa oqaluuseriniarlugu Nunavummi naalakkersuisut sapaatip akunnerani matumani ataatsimiinniarput.