Iqalunni eqqaavissuaq suli ikuallappoq

Nunavummi illoqarfiit pingaarnersaanni Iqalunni eqqaavissuaq maajimili ikuallalerpoq, kingunerisinnaasaanullu ernumaleraluttuinnarput.
Allattoq Tikaajaat kristensen, Marianne Stenbæk, Iqaluit, Nunavut.
aggustip 08-at 2014 11:28

Iqalunni eqqaavissuaq suli ikuallappoq. Ikualaneri takuneqarsinnaanngikkaluarput, illoqarfiummi eqqaavisuani eqqagassat ataa ikuallammat.

Ikuallattoqalermalli qaammatit marluk affarlu qaangiutereerput. Eqqagassat, illut quleriit sisamatulli portutigisut arsaattarfiillu marluttulli isorartutigisut, ataanni aamaarpoq.

Ikuallattup ajornartorsiutit amerlisikkaluttuinnarpai
Ikuallattup qaminnissaanut kina akiliissanersoq Iqalunni Nunavummilu naalakkersuisut isumaqatigiissutigisinnaannginnerat ajornartorsiutit ilagaat, sulilu qanoq qaminneqassanersoq naluaat. Ikuallattup qaminnissaanut 12 millionit koruunit atorneqassasut naatsorsuutigineqarpoq.

Ikuallanneq ernumalersitsigaluttuinnarpoq, Iqaluimmi tungaanut pujortarpoq, pujorlu akuutissanik ulorianartunik ulikkaarpoq, ilaatigut toqunartoq kræfteqalissutaasinnaasoq dioxin. Tamannalu ajornartorsiutit annersaraat.

Pisortat mianersoqqusisimapput: meeqqat, arnat naartusut utoqqaallu ikuallattoq qanillissanngilaat. Ikuallattulli pujua illoqarfiup tungaanut ingerlaartillugu tamanna ajornakusoorsinnaavoq, taamaammat sukkanerpaamik aaqqiisoqarnissaa pisariaqaleraluttuinnarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq