Iqaluit itisuumik umiarsualivittaalersoq

Tamannalu Canadami naalakkersuisut maanna allanngortikkusuppaat.

Umiarsualivimmik itisuumik pilersitsinissamut canadamiut dollarsiutaannik 64 millioninik, tassalu 330 millionit koruunit missaannik, Canadami naalakkersuisut kiisami immikkoortitsisimapput. Canadian Press nittartakkamini taama allaaserisaqarpoq.

Aammami piffissanngorpoq.

- Ulinnganerani angallataatillit piniartullu umiarsualivimmut ataatsikkoorlutik appakaanniarsarisarput, Iqalunni borgmesterip tullia Simon Nattaq oqaluttuarpoq ataatsikkoorlunilu umiarsualivimmut appakaanniartarneq ilaanneeriarluni navianarsisinnaasartoq aamma oqaatigalugu.

AAMMA ATUARUK Canadami qinersisoqartussanngorpoq

Tamannalu maanna oqaluttuaannanngortinneqassaaq. Naalakkersuisummi Nunavummiut itisuumik umiarsualivittaarnissamik kissaateqarnerat piviusunngortittussanngorpaat.

- Inuutillunga taama pisoqalernera nuannaarutigaara, Nunavummi assartuinermut ministeri Monica Ell oqarpoq nangillunilu:

- Aningaasarsiornikkut kaaviiaartitsinerunissamik qulakkeerinnissaaq, aamma itisuumik umiarsualiveqalernikkut umiarsuit takornariartaatit ajornannginnerusumik talissinnaanngussapput. Kiisalu aamma umiarsuit pajuttaatit isumannaannerusumik sukkanerusumillu talissinnaanngussapput, Monica Ell taama oqarpoq.

Umiarsuimmi pajuttaatit umiarsualivimmi ikkattumi talissinnaannginnerat pissutigalugu sanaartornermik suliniutit ukioq ataaseq angullugu kinguaattorfiusinnaasarput.

Itisuumillu umiarsualivittaarnikkut ajornartorsiutit taama ittut qaangerneqartussanngorput.