Ippernaq nunarsuarmi uumasuni ulorianarnersaavoq
Inuit 725.000 ippernamit kapitinnermit ukiut tamaasa toqusartut nittartakkami allaaserinnittartut Gatesnotes allapput. Taakku kisitsisit WHO-mit pissarsiarisimavaat.
Nunarsuarmi toqutsisinnaasuni ulorianarnerpaat tulliat, tassaasut inuit, ukiumut 475.000-inik inuartarinnittarput. Amaqqunullu sanilliutissagaanni taakkua ukiumut inunnik qulinik toqutsisartut nalunaarsorneqarsimapput.
Ippernalli tamarmik uloriananngillat, ippernalliuku malariamik tuniluutsitsisartut pineqartut Pinngortitaleriffimmi biologi Josephine Nymand oqarpoq.
AAMMA ATUARUK Isugutannerulerneratigut kiannerulerneratigullu ippernaqalernerulissaaq
- Ippernaq eqqarsaatigalugu ulorianaateqanngilaq, nappaalliuna inunnut uumasunullu tunillaassutigisinnaasaa ulorianartuusoq.
Nunatsinnili tunillatsinnissat ernumanissamut pisariaqanngilaq.
- Kalaallit Nunaanni ippernat nappaammik taamatumik tuniluutsitsisinnaanngillat.
AAMMA ATUARUK Aasaq ippeqinarniartoq
Aasaq manna sila naliginnaasumiit nillernerugaluartoq pinngortitaq ippernassaaleqinngitsoq Josephine Nymand nassuiaavoq.
- Ippernat ineriartussappata imeq pisariaqarpoq, aasaq mannalu taseqartorujussuusoq. Tasilli aaliangersimasumik kissassuseqartariaqarput ippernat ineriartussappata. Ippernaqassusaanut sumiiffik taamaammat apeqqutaasorujussuuvoq.
