IPIS Sisimiunut aappagu nuunneqassaaq
IPIS 2009-mi pilersinneqarpoq arfineq-marlunnillu aalajangersimasumik atorfilinnik sulisoqarluni. Sulisut Sisimiunut nooqataanissartik akuerissagunikku aatsaat atorfiitik pigiinnarsinnaassavaat.
- Sulisut ataasiakkaat tamanna namminneerlutik aalajangiiffigissavaat. Atorfiit tamarmik sullissivittaassamut nuunneqartussaassapput, naalakkersuisoqarfimmi pilersaarusiornermut inerisaanermullu immikkoortortaqarfimmi pisortaq, Kirsten Olesen, KNR-imut taama oqaluttuarpoq.
Ilisimasaqarfik Sisimiunut nuunneqaraluartoq innarluutilinnik minitaasoqarnavianngilaq.
- Ilisimasaqarfiup suliaata sullissivimmi Nunatsinnilu tamarmi illoqarfinni innarluutillit najugaqarfigisaanni ingerlanneqarnissaat erseqqissassallugu pingaaruteqarpoq. Taamaammat sullissivimmi sulisut angalasarnissartik naatsorsuutigisariaqassavaat, Kirsten Olesen oqarpoq.
Suliassaqarfiit nutaat aalajangersarneqassapput
Ilisimasaqarfiup nuunneqarnissaa suleqatigiissitat arlallit 2014-imiilli piareersaarusiorfigaat, kommunit, annertuumik innarluutilinnut nuna tamakkerlugu ulloq unnuarlu angerlarsimaffiit, innarluutilinnullu tunngatillugu susassaqartut allat IPIS-ilu suliamut peqataatinneqarsimallutik.
Sullissivittaassap suliassaqarfii nutaat aalajangersarnissaat aamma aallartissinnaanngorpoq.
Tamanna Sisimiuni nuna tamakkerlugu innarluutit pillugit sullissivittaassamut pilersaarummi, ilaqutariinnermut, naligiissitaanermut isumaginninnermullu naalakkersuisup Martha Lund Olsenip sapaatit-akunnerata siuliani tusagassiortunik katersortitsilluni saqqummiussaani atuarneqarsinnaavoq.
Sullissivittaassap sanaartorneqarneranut 50 mio. koruunit missaat immikkoortinneqarsimapput, ingerlatsinissamullu aningaasassat aningaasanut inatsisissatut siunnersuummi aamma qulakkeerneqarsimapput.
Sanaartornissamut pilersaarut malillugu, sullissivittaassap illutassaata sanaartorneqarnera ukioq manna aallartinneqassaaq, IPIS-ilu Sisimiunut 2016-imi nuunneqassalluni. Innarluutit pillugit nuna tamakkerlugu Sisimiuni sullissivittaassaq 2017-imi apriilip qaammataani pisortatigoortumik atoqqaartinneqartussatut pilersaarutigineqarpoq.
