iPhone 4-t 50-t Nuummi tillinneqartut suli ujaarineqarput
TelePost-ip Nuummi quianut tillinniat sisamanngormat novembarip sisamaani tallimat missarigaa isersimariarlutik, nioqqutissat katillugu 300.000 koruunit sinnerlugit nalillit tillissimavaat. Nuummi Politiit tillinniat suli kinaassusersinngilaat.
Allattoq Najaaraq Egede
novembarip 12-at 2010 14:17
Oqarasuaatit angallattakkat, mobiilit akisoorsuit, iPhone 4-t 32 gb-imik qarasallit 50-t katillugu 334.950 koruuneqartut tamarmik nutaavissuupput puuminniillu niuneqarnikuunatik. Taakku Telepostip quiani sisamanngormat kingullermik tallimanut tanneq qulinngortoq tillinneqarsimapput. Politiassistent Allan Lørup, Nuup Politiivini tillinniartartunik paasiniaasartoqatigiinniit taama ilisimatitsivoq.
Politiit ilimagaat mobiilit taakku inunnut tuniniarneqarsimassasut. Amerlassusaasalu aamma ilimanarsisippaat, sinerissamut allaat tuniniarneqarsinnaanerat.
Taamaammat politiit inunnit - tillinniat tillitallu iPhone4-t sumiinnerinik paasissutissiisinnaasunit - attavigeqqupput. Nuummi Politiit normoraat 32 14 48.
