Ipadinik suliniut TELE-mut akornutaanngitsumik killilimmik internetteqartinneqassaaq

Nunatsinni atuartut 3.000-it iPad-inik nutaarluinnarnik tunissuteqarfigineqarunik internettimik killeqartupilussuarmik atugassaqartinneqartussanngorpasipput.

iPadinik suliniummut ilusiliat marluk Naalakkersuisut akuerisimavaat, taakkulu atorlugit Qeqqata Kommuniata Kommuni Kujalliullu suliniut ingerlateqqissinnaavaat.

Ilusiliat toqqarneqartut, Namminersorlutik Oqartussani atorfilittat naapertorlugit, unammilleqatigiinnermut inatsimmik unioqqutitsinatillu atuartut internettersinnaanerinut tunngatillugu assigiinngisitsissanngillat.

Ilusiliat marluusut aqqutigalugit Naalakkersuisut aamma aalajangerpaat, iPadinik 3.000-inik atuartunut tunissuteqarnissamik suliniut TELE-POST-imut millionerpassuarnik sinneqartooruteqartartumut akornutaassanngitsoq - sinneqartoorutit akileraarutit ilanngaatiginnginnerini siorna 103 millioner koruuninik aningaasartaqartut, nunatta karsianut iluaqutaalluartarput.  

Ilusiliaq siulleq, borgmesterip Hermann Berthelsenip suliniummik aqutsisuusup toqqassaguniuk, iPadit 3.000-iusut atuarfiit attaveqaataannut pioreersumut Attammut atassuserlugit internetterutigineqarsinnaassapput, atuartullu tamatumani killilimmik internettersinnaassallutik.
 
Ilusiliat Naalakkersuisunit akuersissutigineqartut aappaat, tassaavoq datanik aalajangersimasumik annertussusilikkanik aalajangersimasumillu akeqartitamik TELE-POST-ip suliniummi kommuninut tunisisinnaanissaat.
 
Villumfondimut, qarasaasiaaqqanik 3.000-inik tunissuteqartumut, inaarutaasumik nalunaarnissaq aggustip aallartinneranut ullulerneqarsimavoq.