Inuvialuit isumaqatigiissuteqarfimmut ullorititaat tivanertalimmik malunnartinneqartoq

Inuvialuit isumaqatigiissuteqarfimmut ullorititaat Issittup kippasissuani sapaatit akunnerata siuliata naanerani qaangiuttumi malunnartinneqarpoq.
Tivasoqartillugu nalinginnaasumik ima qanitsigisoqartarpoq. Coronalli takkunnerata kingunerisaanik tivasut akornanni avissaangasoqarnerulerpoq.
Inuvialuit-sumiiffigisaat Canadap issittortaata avannarpasissuaniippoq.
Allattoq Marianne Stenbæk, Montreal, Canada
juunip 15-at 2020 12:55
Nutserisoq Connie Fontain

Inuvialuit nunamik piginnittussaanermik isumaqatigiissummik – The Inuvialuit Final Agreementimik - atsiornerannit ukiut 36-t qaangiupput, isumaqatigiissut Inuvialuit piorsarsimassusaannut siuarsaaqataallunilu illersuisuuvoq.

Inuvialuit nunamik piginnittussaanermik isumaqatigiissutaat Inuvialuit piorsarsimassusaannik naleqartitaannillu aalajangersaasuuvoq. Tamatuma saniatigut Inuvialuit nunap avannarpasissortaani suleqatigiinnermut Canadallu aningaasaqarneranut aningaaruteqartunngortippai.

Isumaqatigiissut ilaatigut Inuvialuit kattuffiannik pilersinikkut sumiiffimmi aningaasaqarneqarnermut patajaatumik tunngavimmik pilersitsivoq. Aammattaaq issittumi uumasunut avatangiisimullu illersuinissamut qulakkeerilluni.

AAMMA ATUARUK Silap pissusiata allanngoriartornera Tuttuujaartoormiunut ernumalersitsisoq

Taamaammat Inuvialuit ulluannik ukiut tamaasa nalliuttorsiutigisassarpassuusarput. Ukioq mannali nalliuttorsiorneq Covid-19 pissutigalugu annikinneruvoq.

Pisarneq malillugu Inuvialuinni illoqarfiit annersaanni, Inuvimmi tivasoqarpoq, tivasulli corona pissutigalugu imminnut ungasillisimaartariaqarput.

Inuvialuit Regional Corporationip siulittaasuata, Duane Smithip nunaqarfiit tamarmik nalliuttorsiornissaannut nerisassanik nassiussisimallutik CBC-mut oqaatigaa.

- Inuvialuit ulluat uannut taama isumaqarpoq, tassa kikkut tamarmik nuannaarlutik Inuvialuit piorsarsimassusaannik malunnartitsinerisa takunissaat, Duane Smith oqarpoq.

Taassuma ullormik malunnartitsineq inuusuttut Inuvialuit piorsarsimassusaannik ilikkagaqarnissaannut pingaaruteqartoq ilanngullugu oqaatigaa.

Amerlasuut Covid-19 pissutigalugu illoqarfiliarnatik pinngortitamukaapput.

AAMMA ATUARUK Inuvialuit filminut tunngasunik suliaqarsinnaanermik sungiusarneqassasut

- Taamaaliornikkut piorsarsimassuserput pinngortitami atoqqissinnaavarput, tamanna amerlasuut ukiorpassuarni iliuuserisimanngilaat, Duane Smith naggasiivoq.

Tivanermik nalliuttorsiorneq ungasianiit uani takuneqarsinnaavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq