Inuvialuit filminut tunngasunik suliaqarsinnaanermik sungiusarneqassasut

Northwest Territoriesip suliffissuaqarnermut aningaasaliisarnermullu ministeriata Wally Schumannip inuusuttut filminik suliaqalernissaannut sungiusartitsinissamut pilersaarutit sapaatip akunnerata siuliani filmfestivalertoqarnerani saqqummiuppai.

Pilersaarummi Inuvialuit Issittup kippasissuaniittut aamma ilaatinneqarput.

Sumiiffimmi filmiliortarneq ukiuni kingullerni marlunni annertuseriangaatsiarnikuuvoq. Filmiliat sisamat, TV-kkut nangeqattaartartuliat piviusumik aallaaveqartut marluk, isiginnaagassiaararpassuillu hunnorujulikkaat soorlu TV-kkut ussassaarutit sumiiffimmi tassani suliarineqarsimapput. Tamatumani pinngortitamut avatangiisit asseqanngitsut tunngaviunerupput.

Suliffinnik nutaanik pilersitserusuttoq

Filmiliortarnerup taama ingerlaannarnissaanut takussutissarpassuupput, taamaammat filmiliornermik TV-kkullu nangeqattaartulianik suliaqarnerup teknikkianut tunngasunik sumiiffimmi ilinniarsimasut amigaataangaatsiarput.

Sungiusaanermi inuusuttut filmiornermi pisariaqartunik, teknikkikkut suliaqarnermi piginnaasaqartilerniarneqassapput.

Ministerip Schumannip sulisunik ilinniarsimasoqarneratigut filmiorusuttut TV-kkullu aallakaatitsinerit suli amerlanerusut Northwest Territoriesimut soqutiginnilersinneqarsinnaapput.

Pilersaarut Northwest Territories Professional Media Associatonimit aaqqiissuneqassaaq qaammatinilu tullerni aggersuni aallartinneqassalluni.

Atuartut sungiusarnermut ilaasut angalanissaminnut aningaasartuutinullu allanut aallaqqaasiummik 25.000 koruuninik immikkut tamarmik tunineqassapput.