Inuutissarsiornermut pisortaq nutaaq

Taanna tassaavoq 40-nik ukiulik Hans Henrik Olsen, Ilisimatusarfimmi allaffissornermut ilinniagartuujusoq, Qeqqata Kommuniani Ilaqutariinnermut Ilinniartitaanermullu pisortatut atorfeqarsimasoq.

Hans Henrik Olsen atorfittaamini Sisimiuni atorfeqassaaq, siunnersuisoqatigiit allaffiisa aappaat tassaniittussaamat. Allaffiup aappaa Maniitsumiippoq. Qeqqani Inuutissarsiornermut Siunnersuisoqatigiit, tassaapput siornatigut Sisimiuni Maniitsumilu inuutissarsiornermut siunnersuisoqatigiiusimasut kattunnerisigut pilersinneqartoq.

Siunnersuisoqatigiit piffissami matumani Qeqqata Kommunianut nunap ilaanut inuutissarsiornermik ineriartortitsinissamut aamma inuutissarsiornermut takornarialerinermullu kiffartuussinissamut sinaakkutissatut isumaqatigiissusiornermik maanna suliaqarput. Taamatuttaaq Namminersorlutik Oqartussanut, Inuutissarsiornermut Suliffeqarnermullu Naalakkersuisoqarfimmut kiffartuussinissamik isumaqatigiissummik isumaqatigiinniartoqarpoq.