Nunavut: Inuusuttut timmisartuaqqanik aqutsisinnaanermut allagartartaarsinnaasut
Timmisartuaqqat inuttaqanngitsut tassa dronit orninneqarsinnaanngitsunut timmisinnaammata nunani issittumiittuni iluaqutaangaatsiarput. Timmisartuaqqat nalinginnaasumik 1 meterinit 1,5 meterinut takissuseqartut sumulluunniit timmisinnaapput.
Taakku nunarujussuit uuttortarnissaanni, sumiiffiit itsarsuarnitsat misissuiffiginerini illulluunniit qaliisa aserornikut misissornissaannut iluaqutaangaatsiarput.
Suliffeqarfik naggueqatigiinnit inunnit pigineqartoq Arctic UAV Iqalunni ukiut marluk matuma siorna pilersinneqarpoq. Droninut teknologi inuusuttunit alutorineqarluariarmat suliffeqarfiup naggueqatigiit inuit inuusuttaasa droninik misissuinermik sungiusarnissaat upernaaru aallartinniarpaa.
Teknologi nutaaq qangalilu ilisimasat ataatsimoortillugit sumiiffimmik assiliortuisarput. Taamaammat Nunavummi nunaqarfiit eqqaat inuusuttunit, amerlanertigut nunaqarfinneersunit, assiliortorneqassapput.
Naggueqatigiit inuit inuusuttaasa sungiusarnertik naammassigunikku timmisartuaqqanik aqutsisinnaanermut allagartartaassapput nutaamillu suliffittaarnissaminnut periarfissaqalissallutik.