Inuusuttut suliffissaaleqisut 125-it pikkorissartinneqassasut
Kommunalbestyrelsellu akuersineraniit sapaatip akunneri marluk qaangiutereersut atorfilittat pilersaarusiorlutik maanna ulappupput.
-Piffissakitsuararsuuvugut pilersaarusiornissamut, Inuussutissarsiornermut Suliffissaqartitsiniarnermullu pisortaq Lars Lennert Sandgreen oqarpoq.
-Piffissakitsuararsuuvugut pilersaarusiornissamut, pissutigalugu nutaaliornissaq aamma annertuumik siunnerfiugami, imatut paasillugu, assersuutigalugu Piareersarfinni ingerlareersut nutaaliornertalimmik ingerlatsiniartussaagatta ukuninnga aningaasanik, Qaasuitsup kommuniani Inuussutissarsiornermut Suliffissaqartitsiniarnermullu pisortaq Lars Lennert Sandgreen inuusuttut suliffissaaleqisut Piareersarfinni atuarlersussat pilersaarusiorfigineqarneri pillugit taama oqarpoq.
Qaasuitsup kommuniani suliffissaaleqisunut iliuusissatut pilersaarummi kommunimi suliffissaaleqisut affaasa missaat, tassa 580t, pikkorissarneqarnissaat, inuussutissarsiutini allani sulilernissaat atualeqqinnissaalluunniit siunertarineqarpoq, tassanilu inuusuttut suliffissaaleqisut, soorlu Aasianni, Ilulissani, Uummannami, Upernavimmi Qaanaamilu katillugit 125t Piareersarfinni atuartinneqarnissaanut immikkut aningaasaliisoqarpoq.
Piareersarfittussallu augustimiit aallartikkunik inissaqartinnissaat ilinniartitsisoqarnissaallu ilaatigut maanna misissorneqassapput.
Suliffissaaleqisunut iliuusissatut pilersaarummi siunertat assigiinngitsut piviusunngortinniarlugit Namminersorlutik oqartussani atorfilittat suleqatigineqassapput.
-Atorluassuagut soorunami periarfissaareersut Piareersarfinni, kisianni nutaaliorniassatilluta soorlu avataaninngaanniit ilinniartitsisuusinnaasunik nutaanik, uanga eqqarsaatigaara ujartorniartariaqaripput nutaaliorniassagutta.
- Taanna suli tikinngilarput, kisianni taanna eqqarsaataavoq taamatut periuseqarnissarput, Lars Lennert Sandgreen oqarpoq, naak piareersarnerit maanna ulapputigineqaraluartut, ukiup tullianimut pilersaarutit piffissaqarluarlutik suliarissavaat.
- Tassa sapinngisamik isumatusaartumik soorunami aningaasat taakku qujarullugit atorluarniassuagut, taava aappaagussamut isumaqatigiissuterput naapertorlugu, septemberimi pilersaarutaasussat eqqartoqqissuagut Naalakkersuisoqarfillu, qanoq ililluta taakku aningaasat atussanerigut, Inuussutissarsiornermut Suliffisaqartitsiniarermullu pisortaq Lars Lennert Sandgreen oqarpoq.