Inuusuttut sianerlutik ikiortissarsiortarput
2010-mut naatsorsuinerit takutippaat, meeqqat inuusuttullu katillugit 278-it oqarasuaammut saaffiginninnermikkut ajornartorsiutimminnik assigiinngitsunik ikiorneqarlutillu ataasiakkaarlutik siunnersorneqarsimasut.
Kiserliorneq, imminut toqunneq, kinguaassiutitigut atornerlunneqarneq, aanngajaarniutit, asannilersoornermik pissuteqartumik annersaanerit assortuunnerillu oqaloqateqarnermi tikinneqaqqakajuttarput.
Pinaveersaartitsineq pillugu siunnersuisoqatigiiffik Paarisa tusagassiuutitigut nalunaaruteqarluni allappoq, oqarasuaammut 134-mut atatillugu ukiumut nalunaarusiaq, ilisimasanik katersuiviusoq pingaarutilik, inuusuttullu ajornartorsiutaannik ersersitsisartoq, aammali ajornartorsiutit ajornartorsiutinut allanut attuumassuteqartuaannarnerannik takutitsisoq.
Meeqqat inuusuttullu oqarasuaataat ullut tamaasa unnukkut nalunaaqutaq arfineq-marluniit qulingiluat tungaannut sianerfigineqarsinnaasoq, niviarsiaqqanit atorluarneqarnersaavoq, tassa sianertut tamarmik 66 procenterigamikkik. Oqarasuaammik tigusisartut inuussutissarsiutigalugu inunnik isumaginninnermik ilinniagaqarsimasuupput meeqqanillu siunnersuinermik misilittagaqarlutik.
