Inuusuttut sakkortuuliorumatuut mattussaapput

Angut 22-nik ukiulik sisamanngornermi Qaqortumi politiinit tigusarineqarpoq. Angut siusinnerusukkut pinerluuteqarsimanini pillugu Pinerluuteqarsimasunut inissiisarfimmiititaasimasoq, qaammatillu sisamat missaanni sinneruttut misiligummik iperagaaqqanermini pinerloqqippoq.

22-nik ukiulik annersaasimasutut, sioorasaarisimasutut, tillinniarsimasutut, aamma pisortani sulisunik sulineranni akornusersuiniarsimasutut politiillu aqqusinermi maleruaqqusaannik nalinginnaasunik unioqqutitsisimasutut unnerluutigisassanngortinneqarpoq.

Angut 22-nik ukiulik Qaqortup Eqqartuussivianut tallimanngormat februaarip sisamaani sassartinneqarami ulluni 28-ni tigummigallarneqarnissani angutip akueraa.

Pisimasoq alla angummut 24-nik ukiulimmut tunngavoq, tallimanngornerlu februarip sisamaat pisimasuulluni. Angut 24-nik ukiulik angut alla peqatigalugu angummik imerniartarfiit ilaata saani tallimanngornermi unnukkut saassutarinnissimapput.. Angutip aappaa ingerlaannaq iperarneqarpoq sakkortusaarnerusorli tigusarineqarluni. Angut 24-nik ukiulik pinerluttulerinermik inatsimmik arlaleriarluni unioqqutitsereersimasoq, tigummigallarniarlugu aalajangerpaat, pinerluutai allat sisamat allassimasuutigereeramikkit.

Angut 24-nik ukiulik Qaqortumi Eqqartuussivimmut arfininngormat sassartinneqarpoq, sapaatip-akunnerini sisamani tigummigallarneqassalluni, tamannali angutip Nunatta Eqqartuussivianut ingerlateqqippaa. Angutip sapaatip akunnerini sisamani tigummigallarneqarnissaanik politiit piumasaat Nunatta eqqartuussiviata atuutitiinnassasoq kingusinnerusukkut aalajangerpaa.

Angut persuttaasimasutut arlaleriarlunilu pisortani sulisut sulinerannik akornusersuisimasutut unnerluutigisassanngortinneqarpoq.