Inuusuttut qinnuteqarfissartik nalunngilaat

Ilinniarnissamut ulloq qinnuteqarfissaq ataasinngorpamut killeqarpoq. Peqqissaasumut, igasumut revisorimullu ilinniarniarlutik qinnuteqartut tunniussiartortut ullumi naapippavut:

Qinnuteqartut ilaasa meeraallutilli suliffigiligassatut takorluukkatik qinnuteqarfigaat.

Ulunnguaq Lyberth 21-inik ukiulik aasaru ilinniarnertuunngorniarnerminik naammassinnittussaq, Peqqissaasutut ilinniarnissaminut qinnuteqarpoq.

-Meeraallungali peqqissaanermik suliaqalernissara eqqarsaatigisarsimavara, aamma atuarfimmit suliffimmik misiliinermi napparsimavimmi sulivunga, Ulunnguaq Lyberth oqarpoq.

Peqqissaasumut ilinniarfimmi ilinniartunngornissani ilimanaateqarnerarpaa, tassani akuerisaassanngikkuni, Niuernermik Ilinniarfimmut qinnuteqarniarpoq aningaaserivimmi sulilernissani aamma soqutigigamiuk.

Jonna Andersen igasunngornissani meeraallunili eqqarsaatigisarsimavaa, maannakkulu tuluttut qallunaatullu karakterini qaffassarniarlugit Piareersarfimmi ilinniartunngornissaminut qinnuteqarpoq, igasumut ilinniartunngornissani anguniarlugu.

Arnannguaq Eriksen Reimer Niuernermik ilinniarfimmi ilinniartunngorniarluni qinnuteqarpoq.

- Kisitsisinut tunngassuteqartunik piginnaasaqarnera aallaavigalugu revisorinngorniarpunga, oqarpoq.

Niuernermut ilinniarfimmi ilinniartunngornissaminut akueritissanngikkaluaruni, HTX-imi iliniartungorniarpoq, karakterini qaffassarniarlugit..

Ilinniarnissamut qinnuteqartut ilinniarfissatut kissaatigisartik akuerineqassanngikkaluarpat, ilinnniarusutatut kissaatigisamik aappaa ilanngullugu qinnuteqarfigisinnaavaat. Ilinniarfissatut qinnuteqarfigineqarsinnaasut nittartakkami www.sunngu.gl imi takuneqarsinnaapput.