Inuusuttut qinersiartortut oqaaseqartippagut

novembarip 15-at 2005 13:50

Sinerissami inersimasorpassuit qinersivippassuarnut qinigassaminnik ullumi titarsiartorput. Inersimasut qinersinermikkut nipaat qinersinerup inerneranut nipilersueqataalluinnartussaavoq. Qinersinerli manna, inersimasuinnarnut periarfissiinngilaq. Inuusuttorpassuit ullumi aamma qinersipput, ilanngui qinerserngaarlutik. Qinersiartortut apersorpagut naliliisillugillu.

Inuusuttoq siulleq naapitarput 18-ileeqqammerpoq qinerserngaalerlunilu. Aperaarput qinersinissi qanoq igineraa, akivorlu:

- Nalunarpoq kina qinissanerlugu. Aperigatsinnilu sooq nalorninersoq aki aamma nalullugu. Taamaattorli qineqqusaartunut malinnaalaarsimanerarpoq ingammik atuarfimminni. Angutip inuusuttup qinigassa aatsaat aalajangerusuppaa allagartaq qinersivissaq qimerluualaajutigalugu.

Aamma napipparput arnaq inuusuttoq 19-inik ukiulik Inatsisartunullut qinerseqqaartoq. Qinerseqqaarnini assut nuannarinerarpaa:

- Malinnaajartuinnarnera malunniarsiartuinnarpoq maluginiartupilussuuvakka qineqqusaartut qineqqusaarutaat, soorlu umiarsuit tuniniarneqarneqarnerat utoqqaallu pillugit qineqqusaarutaat. Niviarsissap qinigassi aalajangiussimanerarpaa.

Naggataagut apersorparput angut inuusuttoq 23-inik ukiulik Inatsisartunut aappassaannik qinersisussanngortoq.

Qinersineq nalilersinnannginnerarpaa taamaattorli qineqqusaarutit nalilerusuppai:

- Piffissaq aatsaat taamalimmat qinersineq nalilersinnanngilara kisianni qineqqusaarneq eqqarsaatigalugu isumaqarpunga qineqqusaarutit ilaatigut assigiitsorujuusarsimasut. Anguniakkatik qanoq anguniarneraat, taava partiit aallaavii, soorli ideologiivi, assigiinngitsunut isiginnittariaasaat, tamakku saqqumivallaarsimanngillat. Soorlu eqqartorneqartorujuupput meeqqat sumiginnakkat, atuarfeqarnermut tunngasut, tamakkua soorunalimi tamarmik suliniutigerusuppaat, kisianni qanoq anguniarnerlugit, taanna erseqqarinerusinnaagaluarpoq.