Inuusuttut qineqqusaartut isumaqatigiittut

Siumup Inuit Ataqatigiillu qineqqusaartitaat arfiniliigaangata ataaseq partiit inuusuttortaanneerpoq. Taakkulu inuit ilinniarnerat tarnikkullu peqqinnerat nunatsinni anguniagassani pingaarnerpaat ilaanniitippaat.
apriilip 26-at 2018 06:52

Nunatsinni partiit annersaanni marlunni, Siumumi Inuit Ataqatigiinnilu, kinguaariit nikippasilerput.

Inuit Ataqatigiit Inatsisartunut qineqqusaartitaanni 62-iusuni qulit, Siumullu qineqqusaartitaanni 59-iusuni qulit, partiit inuusuttortaanneersuupput.

AAMMA ATUARUK Nuummi qinersisinnaatitaasut pingajorarterutaat qinersiartunngitsut

Politikerit misilittagallit arlallit, ilaatigut Hans Enoksen Vittus Qujaukitsorlu, Siumumit ukiuni kingullerni ilaasortaajunnaarput. Taakku partiinik pilersitsipput, sukkasuumillu namminiilivinnissaq anguniagaralugu.

Siumulli sassartitaasa 35-t ataallugit ukiullit namminiilivittoqannginnerani inuiaqatigiittut nukittuumik toqqammavissamik pilersitseqqaartoqarnissaa kissaatigineruaat.

Siumup inuusuttortaasa siulittaasuat, Steve Olsvig Sandgreen taama KNR-imut oqarpoq.

- Siumup piviusorsiornerulluni ingerlanera inuusuttut takusinnaavaat. Taamaattoqarnera inuusuttut taama amerlatigilernerannut isumaqartorujussuaq isumaqarpunga, Steve Olsvig Sandgreen oqarpoq.

AAMMA ATUARUK Taamaammat qinersinngilagut

Taassuma ilanngullugu oqaatigaa, ingammik meeqqanik inuusuttunillu isumaginninneq tarnikkullu peqqinneq Siumup inuusuttortaasa pingaartinnerpaasaasa ilagigaat.

Siumup inuusuttortai aamma partiip allaffiani siulersuisuunerinilu arlalinnik ilaasortaatitaqarput.

Aamma Inuit Ataqatigiit inuusuttortaasa inuusuttut atugaat maanna namminiilivinnissamit pingaartinnerugaat, Inuit Ataqatigiit inuusuttortaasa siulittaasuata tullia, Nukannguaq B. Jensen oqarpoq.

Inuit Ataqatigiit inuusuttortaasa Inuit Ataqatigiinnit assigiinngissutaat pillugu taanna ima oqarpoq.

- Immaqa assigiinngissutaanerpaajuvoq, inuusuttut inuusuttutut eqqarsartariaaseqarnerat. Ilinniartitaaneq, soorlu ilinniartuulluni meeraqarneq, tamakkua assigiinngitsorpassuit uagut eqqartornerusarpagut, Inuit Ataqatigiit inuusuttortaasa siulittaasuata tullia, Nukannguaq B. Jensen oqarpoq.