Inuusuttut pujortartarunnaarsinniarpaat

Puakkut kræfteqarneq, pujortarnerluunniit pissutigalugu nappaatit allat Nunavummi inuppassuit toqqutigisarpaat. Inuusuttulli pujortartaqqunagit oqaaqqissaaraluaraanni upperiuminaatsittarpaat. Aqqaneq-marluk 18-illu akornanni ukiullit pujortartarunnaarsinniarlugit Nunavummi naalakkersuisut paasisitsiniaalerput, teknoliilu nutaaq atorlugu taamaaliorput, inuusuttunut paasinarsarlugu.

Nunavummi inuusuttut videoliortartut pujortartarnerup qanoq navianartiginera pillugu ilanngutassianik naatsukullakkaarlugit suliaqarput. Tamakku Nunavummi atuarfinni takutinneqartalissapput. Ilanngutassiat klassini assigiinngitsuni oqallisigineqartassapput, inuusuttut pujortartannginnissaat taamaalilluni paasititsissutiginiarsariniarlugu.

Ilutigalugu unammisitsisoqartassaaq, videoliallu sorliit nuannarinerunerlugit, sorliillu sunniuteqarluartussatut piukkunnerlugit, atuartut taasissutigisassavaat. Videoliat ajugaasut TV-qarfissuakkut CBC-kkut upernaaru takutinneqassapput. Atuartut taasisimasut aamma akissarsiassaqartinneqassapput. Suliniutip taassuma inuusuttunut pujortartartunut pujortarunnaarsitsinissaa, imaluunniit inuusuttut pujortartalinngissaanut iluaqutaanissaa neriuutigineqarpoq. Canadami ilanngutassiortorput Marianne Stenbæk taama tusagassaqartitsivoq.