Assi: Privat foto

QULAARPAA Inuusuttut praktikkerfissaaruttut ilinnialinngitsoortarput

Inuusuttut ilinniarusuttut praktikkerfissaaruttarnerat sanaartornerup iluani kisimi ajornartorsiutaanngilaq. Aammali allaffimmiunngorusuttut arlallit praktikkerfissaqannginneq pissutigalugu ilinniakkaminnik aallartitsinngitsoortarput.

- Nuanniittorujussuuvoq. Uanga atuarnermik unitsitsiinnarneq nuanniigigakku assorujussuaq, taava iluaangerujussuarnikuuara, Maritha Broberg, 30-nik ukiulik, Qeqartarsuarmi najugalik oqaluttuarpoq. Taassuma 2014-mi praktikkerfissaarunneq pissutigalugu allaffimmiutut ilinnialernissani unitsiinnartariaqarsimavaa.

Maritha Brobergilu praktikkerfissaarunneq pissutigalugu inuussutissarsiornerup iluani ilinniakkamik unitsitsisimasuni imaluunniit ilinnialinngitsuuittuni kisimiinngilaq.

- Naammattoortarpagut immaqa pingajorarterutai qulakkiivittarpaat aasami praktikkerfittaarnissartik. Kisianni pingajorarterutaata aamma immaqa sulinerulaaqqaarlutik ilaallu aamma pingajoraarterutaat takoqqinngitsoortarlutigit ilaannikkut, Elise Kielsen, Nuummi Niuernermik Ilinniarfimmi ilinniartitsisoq taama oqarpoq.

Ilinniagaqarsimaneq pingaaruteqarluinnartuuvoq

Nunatsinni innuttaasut pingajorarterutaat meeqqat atuarfiata naammassinerup saniatigut allamik ilinniagaqarput. Ilinniagaqarsimanerlu inuusuttut siunissaannut pingaaruteqarluinnartuuvoq.

- Nalunngilarput ilinniarluarsimasut peqqinnerusartut. Inuuneqqortunerusarput. Aammalu akissarsiagissaarnerusarlutik, taamaalillutik inuiaqatigiinnut akileraarnerusinnaallutik. Aammattaaq nalunngilarput ilinniarsimasut ilinniarsimanngitsunut sanilliukkaanni inuunerminni ingerlalluarnerusartut, Peter Berliner, Ilisimatusarfimmi isumaginninnermut immikkoortortaqarfimmi tarnip pissusaanik ilisimatusarnermi professori nassuiaavoq.

Nuummi Niuernermik Ilinniarfik aamma Qaqortumi Campus Kujalleq niuernermik allaffissornermillu ilinniarfiupput. Suliffeqarfiillu suli amerlanernik ilinniartuuteqarsinnaappata, praktikkerfissaaruttarneq qaangerneqarsinnaasoq, Qaqortumi inuussutissarsiornerup iluani ilinniarfiup pisortaa, Kista Isaksen isumaqarpoq:

- Inuiaqatigiit ilinniarsimasoqarnissaminnik pisariaqartitsipput, tamannalu iluatsissappat tamatta kivitseqataasariaqarpugut.

Maritha suli tunniutiinnanngilaq

Qeqertarsuarmi Maritha Brobergip angorusutami anguniarnissaanut suli tunniutiinnanngilaq.

- Taanna siunniuteqqavara. Aamma eqqarsaatigaara aallartitsinnanga, asuliinnaq unitsitsiinnaqqikkusunnanga, praktikkerfissannik nassaaqqaarlunga, qulakkeeqqaarlugu praktikkerfissaq aallarteqqissallunga, Maritha Broberg Qeqertarsuarmiu taama oqarpoq.

Qulaarpaami sisamanngorpat marsip 31-ani aallakaatinneqartussami ilinniarsimallutik sulisut politikerillu praktikkerfissaaleqineq oqallisigissavaat.

Isummersuutit


 

Pages