Inuusuttut pitsaasunik sammisassaqartinneqarlik

Inuusuttut sunngiffimmi sapaatit akunnerisalu naanerini sammisassaqarnissamut periarfissannik pitsanngorsaasoqarnissaa pisariaqarpoq. Tamanna ilaatigut kommunimi katersortarfiit ammatinnerisigut pisinnaavoq. Tallimanngornikkut arfininngornikkullu inuusuttunut 18-it inorlugit ukiulinnut sunngiffimmi sammissaqarpiartanngilaq. Taamaammat pissusissamisuussaaq taakkununnga sunngiffimmi periarfissanik pitsaanerusunik aqqutissiuussisoqarpat.

-Nipilersortartorpassuaqarpugut sapaatit akunnerisa naanerini inuusuttoqatiminnut tusarnaartitsisinnaasunik. Taamaammat inuusuttut nipilersortartut sungiusartarfissaannik nassaassuttariaqarpagut, sapaatit akunnerisa naanerini qititsisarniassapput, inuusuttunullu illoqarfimmioqatiminnullu nuannaartitsillutillu iluaqutaallutik,  Edvard Geisler, naalakkersuisuusimasoq ullumikkullu kommunimut qinigassanngortittoq isumaqarpoq.