Inuusuttut pisortassaqqissut Royal Greenlandip ilinniartilerpai
Royal Greenlandip suliffeqarfissuani, pingaartumillu Kalaallit Nunaanni aammali suliffeqarfissuarmi tamarmi, ilinniarluarsimasunik aqutsisunik immikkulluunniit ilisimasalinnik atorfeqartitsilernissani qulakkeerniarusuppaa.
- Royal Greenlandip Kalaallit Nunaanni suliffeqarfiit annersaattut, kalaallinik inuusuttunik ineriartortitsinissaq kaammattuiffigalugu peqataaffigerusuppaa. Ineriartortitsilluni suliniut naammaginartumik naammassineqarpat, suliffeqarfitta ilaanni atorfinivinnissamik neqerooruteqarniarpugut. Atorfinitsitsinerlu suliffeqarfissuatsinni nunarsuarmi sumiikkaluamiluunniit pisinnaavoq, kisiannili siunertarerpiarparput Kalaallit Nunaannut piginnaasalinnik pilersuinissaq, sulisoqarnermut ingerlatsisoq, Torben Reimer oqarpoq nangillunilu:
- Ilinniartunik marlunnik aallaqqaammut atorfinitsitsissaagut. Suliniummi misilittakkat nalilersorneqartuassapput siunissamilu ingerlariaqqinnissami aallaaviussallutik. Qularutiginngilarali suliniummi matumani anguniagaqarusuttorujussuugatta, Torben Reimer oqarpoq.
International Management Trainee, taanna suliniut sisamanik immikkoortortaqarpoq aamma Royal Greenlandip nunarsuaq tamakkerlugu suliffeqarfissuani, sumiiffinni pingasuni imaluunniit sisamani ilinniartuunissamik siunertaqarluni.