Inuusuttut pinerluttarneri Qeqqata politiivisa unitsikkaat

Inuusuttoqatigiiaat marluusut aappaat tassaapput inuusuttut 15-init 20-nut ukiullit, tillinniarsimasutut, persuttaasimasutut, akuerineqarani atuisimasutut, serlersaarisimasutut, ikiaroornartumik tigummiagaqarsimasutut, politiit maleruaqqusaannik aqqusinermilu angallannermut inatsimmi aalajangersakkanik unioqqutitsisimasutut unnerluutigineqartut. Taakkununnga pineqaatissiissutaasut taassapput mianersoqqussummik tunineqarneq, inuiaqatigiinnik kiffartuussisussanngortitaaneq, pinerloqqinnermi naammassisassamik pineqaatissinneqarneq akiliisitaanerlu.

Inuusuttoqatigiiaallu aappaat tassaapput inuusuttut 17-init 20-nut ukiullit. Taakku ujajaasimasutut, serlersaarisimasutut, tillinniarsimasutut, akuerineqarani atuisimasut, pisortani atorfilimmut eqqunngitsuliorsimasutut, sioorasaarisimatut politiillu maleruaqqusaannik unioqqutitsisimasut mianersoqqussuteqarnermit pinerluuteqarsimasunut inissiisarfimmiittussanngortitsinermik pineqaatissinneqarput. Pinerluttuliornerit katillugit 20-t piffissami 2012-imi januaarip qaammataanit 2014-imit januaarip tungaanut pisimasut pineqarput.

Inuusuttut tigusarineqarnerinut atatillugu, inuusuttut ilaat politiinut sioorasaaruteqarsimapput tamatuminngalu aamma unnerluutigineqarlutik.

Politikommissær Johan Davidsenip assersuutitut taavaa, inuusuttut arlariiullutik Sisimiuni pisiniarfiit ilaannut tillinniarsimasut. Inuusuttoqatigiiaat pinerlunniaqatigiittut taarusunngilai, inuusuttulli pinerluttuliortarnerisa Sisimiuni eqqartugaasarnerat oqaatigalugu.

- Inuusuttut pinerlunniakujuttartut atugarliortut pineqarput. Ilaat ilisarisimaneqareersut oqaatigaa suliarpassuillu Qeqqata Politiivinut suliakkersuutaangaatsiarsimasut aamma nassuerutigalugu.

Inuusuttut ilaat pinerluuteqarsimasunut inissiisarfimmiittussanngortinneqarsimapput, siunissamilu assingusumik pinerluttulioqqinnginnissaat anguniarlugu Pinerluttunik Isumaginnittoqarfimmeersunit oqaloqatigineqassallutik.

- Pineqaatissinneqarnermik naammassinissaanut qaammat ataasiinnanngorpat Pinerluttunik Isumaginnittoqarfimmeersumit oqaloqatigineqassapput, pinerluttuliornermik kingunerisaanik nukiit qanoq amerlatigisut atorneqarsimanersut taarsiivigineqarnissamillu piumasaqaatigineqartut pillugit oqaluttuunneqassallutik aammalu ukiut tallimat qaangiuppata qanoq takorluugaqarnerinik oqaloqatigineqassallutik, Johan Davidsen taama oqarpoq.
 
Johan Davidsenip aamma oqaatigaa Kangerlussuarmi inuusuttunik assingusunik pinerluttuliorsimasunik aamma pineqaatissiisoqarsimasoq.