Inuusuttut pineqaatissinneqartut Sisimiuni immikkoortoqarfeqalissapput

- Inuusuttut 18-it inorlugit ukiullit sakkortuumik pinerluuteqartut maanna inissinneqartarfianiisinneqartarput, Naalakkersersuisoqarfimmi pisortaq Martha Lund Olsen oqarpoq. Tamannalu Naalagaaffiit Peqatigiit meeqqat piginnaatitaaffii pillugit isumaqatigiissutaanut unioqqutitsineruvoq.

- Inersimasut meeqqallu pinerlussimasut isertitsivimmi akulerutsinnissaat meeqqat pisinnaatitaaffiini innersuussutigineqanngilaq. Annertuumilli pinerluuteqarsimasut, meeraappat inersimasuugaluarpataluunniit, isertitsivinni ajoraluartumik ataatsimoortittariaqartarpavut, Martha Lund Olsen oqarpoq.

Meeqqanut inuusuttunullu immikkoortortaqarfiup matoqqasup pilersinneqarnissaa pillugu inatsisartut 2007-imi siunnersuuteqarfigineqarput, siunnersuummilu siullermi meeqqat inuusuttuaqqallu inersimasunut politiinit tigummigallarneqartunut atugassarititaasut assinginik pineqarsinnaanerat kissaatigineqaraluarpoq, tamannali qinikkat akornanni akuersaarneqanngimmat siunnersuut allanngortinneqarpoq matoqqasutullu immikkoortortaanissaa siunniunneqarpoq.

Matoqqasumik immikkoortortaq Sisimiuni Qasapermiunut immikkoortortaatinneqassaaq, tassani meeqqat inuusuttuaqqallu 15-it 18-illu akornanni ukiullit sakkortuumik pinerluuteqarlutik pineqaatissinneqartut sisamat inissaqartinneqassapput.

Pinerlunnermut naatsorsueqqissaarnermut kisitsisit Kalaallit Nunaanni Naatsorsueqqissaartarfimmit 2007-imi saqqummiunneqartut ersersippaat meeqqat inuusuttuaqqallu 15-it 19-illu akornanni ukiullit 290-it pinerluttulerinermik inatsimmik unioqqutitsisut.

Inunnulli ulorianartorsiortitsinernik kinguneqartunik inuusuttut qassit pinerluuteqarnersut kisitsisini takuneqarsinnaanngillat.

Matoqqasumik immikkoortortaqarfissap pisariaqartinneqarnera qanoq annertutiginersoq isumaginninnermut naalakkesuisoqarfimmit maanna ilisimaneqanngikkallarpoq, Kalaallit Nunaanni pinerluttulerinermik isumaginnittoqarfiup pisortaata Elisæus Kreutzmannip matoqqasumik immikkoortortaqarfissaq pisariaqartoq oqaatigaa.

- Ukiuni kingullerni malugisarpara inuusuttut pinerluuteqartartut ajoraluartumik ilaatigut pineqaatissinneqartut inissiivianiittariaqartartut, Elisæus Kreutzmann oqarpoq.