Inuusuttut oqaatsigut nalilersorpaat

Kalaaliussagaanni kalaallisut oqalussinnaasariaqarpa? Apeqqut taanna akissutissarsiumallugu inuusuttut pingasut tassaasut Janus Chemnitz Kleist, Upaluk Poppel kiisalu Stina Berthelsen ullutsinni inuusuttut akornanni oqaloriaatsit isummallu paasilluarumallugit siullermeertumik misissuipput.

Upaluk Poppel aperaarput misissuinerminni suna tunuliaqutarineraat.

- ICYC aallartimmat ukioq kingulleq ataatsimeersuaratta Nunavummi Iqalunni inuusuttut akornanni oqaatsit atugaanerat pillugu oqaluuseraarput. Tassani misissugassaq nunatsinni kattuffiit assigiinngitsut suleqatigalugit KIK peqataavoq aamma inuusuttut Ilisimatusarfimmi ilinniartut, taavalu Piffik nutaaq taavalu aamma inuusuttut assigiinngitsut soqutiginnittut peqataallutik oqaatsinut tunngatillugu oqallippugut. Taamaattumik tamanna aallaavigalugu apeqqutinik sinerissamut nassiussuivugut, Upaluk Poppel oqarpoq.

Inuusuttut taakku misissuinerminni apeqqutit akisassat sinerissami ilinniarfiusunut nassiussuuppaat. Maannamullu ilinniarfinnit pingasuusunit 42-t kisimik akissuteqarsimapput. Taakkunannga amerlanerit kalaallisut oqaaseqartuugaluarlutik danskisut atuartarsimanertik akissuteqaatigisimavaat. Apeqqullu pingaarnertut apeqqutigineqartoq tassa kalaaliussagaanni kalaallisut oqaaseqartuusariaqarnersoq amerlanernit angerneqarsimavoq. Upaluk Poppel aperaarput, sooq taama ittumik misissuisariaqarsimanersut.

- Una tunngavigalugu, aamma eqqarsaatigisimagatsigu inuusuttut aamma aperiniarlutigik ullutsinni atukkagut oqaatsit qanoq isumaqarfigineraat, unalu aamma siunertarigatsigu sinerissami inuusuttut oqallinnissaat inuusuttullu oqallinnermi peqataanissaat, Upaluk Poppel oqarpoq.

Upaluk apereqqipparput misissuisoqarnissaa sooq pingaartutut isigineraa.

- Arlaanninngaanniit aallartittariaqaratta, oqallinneq inuusuttut akornanni taavalu aamma una eqqarsaatitut tigusassaavoq aperaluta oqaatsigunuku ullumikkut qanoq ineriartortut? Soorunami oqaatsigut ineriartortuassapput apeqqusertariaqarsoraarpullu oqaatsigut sumut ingerlanersut, Upaluk Poppel oqarpoq.

Misissuinerup qanoq ingerlanera aasaru Alaskami ICC ataatsimeersualerpat nalunaarusiatut saqqummiunneqassaaq.