Inuusuttut nipilersorlutik unammilersut

Illoqarfiit sisamat peqataaffigisaannik nipilersortartut unammisinneqalerput. Ajugaasut Europami inuusuttunut festivaalimut anginerpaamut peqataanissamut periarfissinneqassapput.
Allattoq Pipaluk Høegh
oktobarip 31-at 2012 04:46

Nipilersoqatigiit Tasiilamiit, Illoqqortoormiuniit, Nuummiit aamma Paamiuniit nipilersorlutik tallimanngorpat Nuup Katersortarfiani unammissapput. Nipilersoqatigiit unammisussat tassaapput Tasiilamiit unammiartortut MIOL, Illoqqortoomiuni ajugaasut DHM, tallimanngormat Nuummi unammisitsinermi ajugaasut Rockstones  taavalu Paamiuni ajugaasut IceRock.

- Ajugaaniutivinnermilu ajugaasut akissarsiassarissavaat Danmarkimi meeqqat inuusuttuaqqallu ornittagaasa kattuffissuata Ungdomsringip Musikfestivalianut nipilersoriarnissaq, NUIF/Alleq-imi aaqqissuussinermut pilersaarusiornermullu ataqatigiissaarisoq Knud Aqqa Lynge taama ilisimatitsivoq.

Nipilersornermik festivaali Europami inuusuttunut nipilersornerup tungaatigut festivalit anginersarisaat pissaaq 2013-imi Aalborg Kongres & Kultur Center-imi januarip 18-ianiit 19-iata tungaanut. Nunatsinni illoqarfinni sisamaniit nipilersornermik unammisitsineq NUIF-imit aaqqissuunneqarpoq, Kommuneqarfik Sermersooq unammisitsinermut suliassiisuulluni.

Ungdomsringens Musikfestival pillugu paasisaqarnerorusukkuit nittartagaat www.ungdomsringen.dk alakkarsinnaavat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq