Inuusuttut nipilersorlutik imminnut unammisut
Nuup Katersortarfia tallimanngormat unnukkut inunnik ulikkaavippoq. Isiginnaariat amerlanerpaartaat inuusuttuullutik. Nunatsinni illoqarfinni sisamaniit nipilersornermik unammisitsineq NUIF-imit aaqqissuunneqarpoq, Kommuneqarfik Sermersooq unammisitsinermut suliassiisuulluni.
Unammisitsinermi siulliullutik appisimaartut tassaapput Nuummeersut Rockstones. Tusarnaariat assut alutoraat, unammisitsinermilu naliliisartut sisamaasut nipilersortartut nersualaarpaat qanorlu pitsanngoriarsinnaaneranik siunnersuuteqarlutik. Unammisitsineq naammat Rockstones ajugaasutut suaarutigineqarput.
Nipilersornermik festivaali Europami inuusuttunut nipilersornerup tungaatigut festivalit anginersarisaat 'Ungdomsringens Musikfestival' Rockstones-imi nipilersortartut peqataaffigisassaat, pissaaq 2013-imi Aalborg Kongres & Kultur Center-imi januarip 18-ianiit 19-iata tungaanut.
Unammisitsinermi Rockstones-imut unammisut tassaapput Tasiilamiit nipilersoqatigiit MIOL, aamma 13-inik ukiullit nipilersortartut Paamiuneeersut imminnut atsersimasut IceRock. Unamminermi Illoqqortoormiuniit nipilersortartut imminnut atsersimasut DHM-imik aamma peqataapput.
Unammisitsineq marlunnut avinneqarpoq, nipilersortartut ataatsimik appisimaaqqaariarlutik naliliisartunit nalilerneqartarput. Aappassaaneerlutik nipilersoreeramik naliliisartuniillu nersualaartillutillu suut pitsaanerusinnaanersut taakkartorneqareermata, ajugaasut naliliisartuniit toqqarneqarput. Rockstones ajugaaneranut pissutaatinneqarpoq sungiusarluarsimanerat taamaalillutillu pikkorinnerulersimanerat.
