Inuusuttut namminersulernissaq piaarpallaarsoraat

Namminersorneq pillugu isumalioqatigiissitap inassutigisaasa ilagaat Namminersorneq novembarimi taasissutigiteriarlugu aappaagumiit eqqunneqarnissaa. Innuttaasut amerlasuut, pingaartumillu inuusuttut isumaqarput tamanna piaarpallaartoq.
maajip 08-at 2008 09:23

Inuusuttut Inatsisartuinut siorna ataatsimeeqataasut namminersorneq pillugu isumaat assigiinngillat. Minik Schmidtip maanna Ilimmarfimmi upperisarsiornermik ilinniagaqartup taasisitsinissamik tuaviuussineq ajoriffissaqartinngilaa. Isumaqarpoq DR-ip kalaallit pillugit filmiliaata kingorna nunatta ajunngitsortaanik takutitsisoqartariaqalersoq.

-Taanna uanga ajorinngilara tuaviorutta, kisianni imaanngilaq erniinnaq namminersulivissasugut, imaanngilarmi taanna tuavissutigissagipput, oqarpoq.

Minik Schmidt isumaqarpoq danskit kalaallit pillugit filmiliaat eqqarsalersitsisoq Kalaallit Nunaat ajortunik ulikkaartoq.

- Uagut takutittariaqarparput Kalaallit Nunaat ajunngitsortaqartorujussuusoq, pitsaasoqartorujussuusoq.

Taamaalisoqarpat aatsaat innuttaasut neriuuteqalersinnaassasut oqarpoq.

- Neriuullu taanna pingaaruteqassaaq namminersulivinnissatsinnut.

Taamaappat novembarimi angissamaarnersoq aperaarput.

- Ja, uanga maannakkut neriuuteqarama, kisianni soorunami ataqqissavakka aalajangiinerit. Neriuuteqarama uanga tassa ajorinngilara, Minik Schmidt erseqqissaavoq.

Inatsisartut Inatsisartuinut siorna ataatsimeeqataasoq alla Múte Bourup Egede angissalluni aamma eqqarsaatigilereerpaa. Sulili namminersorneq namminersulivinnerlu pillugit paasisitsiniaaneq amigarpallaarnerarpaa, inuiaqatigiinni iluarsisassarpassuaqarnerarlugu.

- Suli taamatut isumaqarpunga. Inuiaqatigiinni ajornartorsiuterpassuit taakku qaangerniaqqaarlugit aatsaat namminiilivinnissaq aatsaat anguniarneqartariaqartoq.

Maluginiarsimavaa inuppassuit suli nalorninerat.

- Nalornissutigisarpaat namminiilivinnissaq namminersulernerlu suunersut. Inuusuttut ingammik oqaloqatigisartakkama ilai oqartarput: ”namminersulivinnissatsinnut piareersimanngilagut, sooruna namminersulivilersugut. Taava nassuiaattariaqartarpakka assigiinngissutaannik, Múte Bourup Egede oqarpoq.

Paasisitsiniaanerup amigassusianik tamanna takutitsinerusoraa. Oqallinnerlu politikeritoqqat akornanni pinerusimanerarlugu.

- Namminersornerullutik Oqartussat iluaniiginnapajaarsimasoq, ungalulerneqarluni, inuiaqatigiinni annerusumik eqqartorneqarani, oqarpoq.

Inuiaat kalaallit novembarip ulluisa 25-ianni taasisinneqarnissamut ilisimasai naammalersimassanerlutik, aperaarput.

- Naammattumik ilisimasaqalersimanavianngitsut ilimagaara. Taama isumalioqatigiissitat isumaliutiissiissutaat annertutigisoq, qaammatialuginnannguit iluanni paasissutissiissutiginiassallugu inoqarfinni Kalaallit Nunaannilu taama angitigisumi amigarujussuarpallaaqaaq, qaammatialunnguit.

Múte Bourup Egede, Ilisimatusarfimmi ukiaru ilinnialernissaminik tusarnissaminik utaqqiisaa maanna Qaqortumi atuarfimmi sulisoq taama oqarpoq.