Inuusuttut naapisimaarput
Inuusuttut 50-it missaanniittut, sinerissami tamarmeersut, juunip ulluisa 28-aniit juulip ulluisa sisamaat ilanngullugu, Narsap eqqaani Iluani katerisimaarput. Mads Lynge paasissutissiissaaq:
Meeqqanut inuusuttunullu suliniaqatigiiffik, Sukorseq, ukiut allortarlugit taama aaqqissuussisarpoq.
Ukioq manna qulequtarineqarpoq, ”Inuusuttut peqqissut”. Naalakkersuisut anguniagassatut siunniussaat, Innuttaasut Peqqissuunissaat 2007-2012, aallaavigalugu, Narsami pitsaaliunermut siunnersorti, Bolethe Stenskov saqqummiussereermat, cafe-metode atorlugu inuusuttut oqallitsinneqarput.
Sukorsimi siulittaasoq, Marie Egede Isbosethsen, aamma Narsami klubbi sinnerlugu aaqqissuussisuusoq oqaluttuarpoq, inuusuttunik naapisimaartitsineq iluatsilluartoq, Iluani Narsamilu pisussat tamarmik pilersaarusiorluagaammata.
- Inuusuttut sinerissami inuusuttoqatiminnik naapitsinertik iluarisimaartorujussuuaat. Piumasarineqarporlu ukiut tamaasa taamatut naapisimaartarnissaq. Neriorsuutigaaralu siulersuisoqatinnut tamanna anngutissallugu, Marie Egede Isbosethsen, Sukorsimi siulittaasoq aamma Narsami klubbimi pisortaq oqarpoq.
2004 tikillugu ukiut tamaasa naapeqatigiittoqartaraluarpoq, akissaalatsinerli pissutigalugu ukiut allortarlugit inuusuttut naapeqatigiissinneqartalerput.
