Inuusuttut marloriaammik sukkulittornerulersimapput
Kalaallit nerisaqarnerat ukiuni kingullerni 14-ini annertuumik allannguuteqarpoq. Inuusuttut sukkulinnik nerisaqartarnerat marloriaammik annertusisimasoq, inuttaasut peqqissusiannik ukioq 2007-imi misissuisitsinerup inernerata tamanna takutippaa.
Nerisassat avataaniit tikisinneqartartut annertunerujussuarmik nerineqartarput, nalinginnaasumik kalaallinit nerineqartartunut soorlu aalisakkanik puisip neqaanik nerisaqartarnermut sanilliullugit. Naatitanit paarnanillu pisunit nerisaqartarneq annertunerulerpoq. Nerisaqarneq pillugu misissuisitsinermi tupaallaatigisarput tassaavoq kalaallit nunaanni nalinginnaasumik nerisarineqartartut soorlu puisip neqaa aalisakkallu nerineqartarnerat amerlasuunit qimakkiartorneqarmat issittumi peqqissuseq pillugu ilisimatooq Peter Bjerregaard oqarpoq.
Tuttup neqaanik nerisaqarneq ukiut 14-it kingulliit ingerlaneranni annertuseriarsimavoq tassami ukiut 14-it siuliinut sanilliullugit marloriaammik tuttup neqaanik nerisaqarneq annertuseriarsimammat, tassungalu pissutaatinneqarput tuttut amerlassusaat ukiut 14-it matuma siornatigut ikinnerummata misissuisitsinerullu kingulliup ingerlanneqarnerani tuttut amerlanerummata. Kalaallit nalinginnaasumik nerisarisartagaasa allannguuteqarnerisigut nappaatit soorlu sukkornermik nappaateqarnerit uumatilunnerit oqimaappallallu amerlinissaat Peter Bjerregaard-ip siulittuutigaa, tamakkualu ukiuni tulliuttuni hundredeni nappaatigineqartalernissaat siulittuutigalugu.
