Inuusuttut isiginnaartitsinermut piginnaasatik misilerassavaat

Ilulissani inuusuttut isiginnaartitsinermut piginnaasatik sapaatip akunnerini sisamani tulliuttuni Sermermiuni misiligarsinnaalerpaat.
apriilip 08-at 2009 13:26

Isiginnaartitsisartoq filmit "Min søsters Børn" kiisalu "Oh happy day" filmiliarineqarmata isiginnaartitseqataasoq, Lotte Andersen, siorna Ilulissaniikkami illoqarfimmi meeqqat inuusuttullu isiginnaartitsinermik sungiusarniarlugit isumassarsigami tamanna piviusunngortinniarlugu ullumi tikippoq.

Lotte Andersen oqaluttuarpoq siorna takornariatut angalalluni Ilulissani Qasigiannguanilu isiginnaartitsillattaagami isiginnaartut qanoq piitaattunik nuannarisaqartigisut takugamigit uteqqikkusuummersimalluni. Maanna piffissami aggersumi tassa atuakkiornermik, erinarsornermik, qitinnermik isiginnaartitsinermilluunniit soqutigisallit soqutigisaminnik ingerlatitseqqissanerlutik misilittaanermikkut paasiniarsinaavaat.

- Piffissap ingerlanerani pinnguarnertut misilittaaneq ingerlanneqassaaq, soorunami aamma pimoorussilluarluni aallussisinnaaneq aamma sammissavarput, taamaalillunga meeqqat, inuusuttut inersimasullumi suleriaatsinik assigiinngitsunik misilittaaqatigissavakka, Lotte Andersen oqarpoq.

Lotte Andersenip suliariniagaa, Kulturhusi Sermermiut peqatigalugit aaqqissugaavoq, maajillu aallaqqaataani isiginnaartitsissummik naammassisaqarnissaq siunniunneqarluni. Oqaatigisinnaavarput Ilulissani najugaqaraanni aqqanillit 17-illu akornanni ukioqarluni isiginnartitsinermik misilittaanissamut suli ilannguttoqarsinnaavoq. Lotte Andersenip suliariniagaa aqagu aallartissaaq.