Inuusuttut inatsisartuisa inaarutaasumik aalajangersagaat

Inuusuttut Inatsisartuisa ataatsimeereerlutik inaarutaasumik aalajangersagartik 26-inik immikkoortortaqartoq, Inatsisartut Siulittaasuannut Jonathan Motzfeldtimut, Naalakkersuisullu siulittaasuannut Hans Enoksenimut Hans Egedep illorsuani ippassaq unnukkut tunniuppaat.

Inuusuttut inatsisartuisa inaarutaasumik aalajangersagaliaminni qulequtsiussatik tallimat tassalu Inatsiseqarnermut, ilinniartitaanermut, angallanermut, peqqissutsimut ilaqutariinnermullu tunngasut inuiaqatigiinni naapertuilluarnerusumik aaqqissuussinissami ilaatinniarneqartutut isigisatik imaqartippaat.

Naapertuilluarnerusumik aaqqissuussinissami inuusuttut ilaatikkusutaat makkuninnga ilaatigut imaqarput:

- Inuiaqatigiinnut kiffartuussinerup nunatsinni pineqaatissiissutigineqarsinnaalernissaa piaartumik sulissutigineqartariaqarpoq.

Aamma:

- Meeqqat atuarfianni ilinniartitsisut atuartullu pissusilersornerat pillugu minnerpaaffittut malittarisassanik aalajangersaanissaq.

Aamma alla:

-Ilinniakkamik tunngavissaqanngitsumik maanaannaq unitsitsinermi ilinniagaqarneriutigisimasat 10 procentii tikillugit utertinneqartarnissaat.

Aamma:

- Peqqinnissaqarfiup sullississutaasa ilaannut akiliuteqartarlernissaq.

Inuusuttuttaaq isumaqarput imigassamik atornerluineq nunatsinni inuiaqatigiit ajornartorsiutaanni annersaasoq, pinaveersaartitsiniarlunilu suliniutit killilersuutinik annertunerusunik tapertaqartinneqartariaqartut.

Inuusuttut inaarutaasumik aalajangersagaliaminnissaaq naqissuserpaat nunatta kalaallinit pigineqarnera, ima oqaasertalersimallugu:

- Manna aqqutigalugu Inuusuttut Inatsisartuinit paatsuugassaanngitsumik oqariartuutigineqassaaq nunarput kalaallinit pigineqarmat.