Inuusuttut inatsisartuini arnarpassuit
Inuusuttut Inatsisartuini ilinniarfinnit partiinillu peqataasunit katillutik 34-init arnat 23-it arnaapput. Tamatuma takutippaa arnat kingulliit politikkimik soqutigisaqarnerulersimasut. Tamannali immikkut maluginianngikkitsik peqataasut oqaatigaat.
Salome Hansen-ip Maniitsumi ATI-meersup arnat amerlanerunerat eqqarsaatigisimannginnerarpaa:
- Imatut maluginianngilara kisianni tassa eqqarsaatigilerlugu arnarpassuupput angutinut naleqqiullugit. Ataatsimiittarfimmulli iserama taamaattussaannartut isigaara, taakku suleqatissarigakkit, ullutsinni arnat angutillu naligiissitaanerulersimanerat pissutaagunarpoq, Salome Hansen oqarpoq. Atuarfimmini ATI-mi arnat aamma amerlanerunerarpai.
- Oqallinnermi arnat amerlasuut oqalliseqataanerat siuariarnertut isigaara massakkut angutaanerusunit aqunneqarnerput eqqarsaatigalugu.
Hans P. Kirkegaard Qaqortumi HHX-ertoq aamma ataatsimeeqataavoq, arnat amerlanerunerat pissusissamisoortutut isiginerarpaa:
- Suu maluginiarpara arnat amerlanerusut, kisianni Qaqortumi aamma arnaanerusut atuaqatigigatsigit aamma sungiusimaannarpara. Aamma qujanaannarpoq, Inatsisartuinnimi angutaanerummata. Siunissami arnat amerlanerit immaqa taava naalakkersuisuniilissapput malittarisassallu allat naalakkersuinerillu akuerisaalissallutik, Hans P. Kirkegaard oqarpoq.
