Inuusuttut Inatsisartuini ataatsimeeqataasunit arnat peqataasut amerlanerunerat nunatsinni naligiissitaanermut Siunnersuisoqatigiit siulittaasuata Agathe Fontainip ima nalilerpaa:
- Taassuma takutippaa ingerlanerput taamattoq, Naligiissitaanermullu Siunnersuisoqatigiinniit maluginiarnikuuarput ilinniarfinni amerlanerpaani arnat amerlanerusartut, taavalu arnat naammassinnittartut amerlanerusarlutik. Taamaakkami ineriartorneq taamatut massakkut ingerlavoq.
Agathe Fontain nangippoq:
- Taamatut ingerlaannassappat ukiut qulit qaangiuppata mumissimasutut inissisimalernissaa takorloorsinnaavarput. Kisianni, neriuppugut naligiinnerusumik ingerlasoqarumaartoq.
- Aamma massakkut inuusuttuaraapput, amerlanerit meeraqanngillat, meerartaarnerullu nalaani arnat tunuarsimaalertarput.
Agathe Fontainip arnat inuusuttut ilinniarfinni Inuusuttullu Inatsisartuini amerlanerunerat nassuiaatissaaleqitippaa:
- Oqartoqarsinnaanngilarli arnat ilinniarfinni silappaarinnerugamik taamaattut, angutit inuusuttuaqqat aamma silappaarissutsimikkut ilinniagaqarsinnaammata. Kisianni nukappissat pimoorussisinnaanerat immaqa tassani annertunerusinnaavoq, kisiannili oqaatigiuminaatsorujussuuvoq sunarpiaq peqqutigalugu taamaattoqarnersoq.