Inuusuttut Inatsisartui pissarsilluarlutillu pissarsilluanngillat
Inuusuttut Inatsisartui ullumi naggammik ataatsimiipput. Ataatsimiinnermut peqataasunik apersuinitsinni apersukkagut politikinngorusunngillat, pissarsilluarsimallutilli.
Heidi Pedersen Sanaartornermik ilinniarfimmi HTX-ertoq ataatsimiinnermut peqataanini nuannarisimavaa.
- Pissarsiaqartorujussuuvugut oqallinnerit nuannersorujussuugamik oqalliseqataajuminarlutillu tamarmik, Heidi Pedersen oqarpoq.
Heidi Pedersen-i politikkimut tunngasunut inuttut soqutiginninnerulersimavoq malinnaanerulersimallunilu, kisianni imminut politikeritut isigisinnaannginnerarpoq.
Birthe Lynge Savimminilerinermi Ilinniarfimmi ilinniartoq Inuusuttut Inatsisartuinut peqataanini pissarsiaqarfigivallaarsimanngilaa ataatsimiinnermi nalaani paasigamiuk politikki namminerminuunngitsoq.
Inuusuttut Inatsisartuinut peqataasut tamarmik ilinniarfimminnut uterunik Inuusuttut Inatsisartuini ataatsimiinnermut peqataanertik atuarfimminnut saqqummiutissavaat.
Inuusuttut Inatsisartuinut peqataasut nunatsinni ilinniarfeqarfinnit peqataapput. Peqataasut 28-iupput, aqutsisullu partiit inuusuttaanneersut tallimaallutik.
